Blerim Vela, shefi i kabinetit të Presidentes së Kosovës, Vjosa Osmani, ka deklaruar se autoritetet serbe po ua mohojnë në mënyrë sistematike qasjen qytetarëve të Kosovës, familjarët e të cilëve gjenden në qendrat e paraburgimin në Serbi.
Përmes një postimi në Twitter, Vela ka thënë se kjo po ndodhë me pretekstin se ata nuk i njohin dokumentet e Kosovës.
Sipas Velës, kjo është një shkelje e marrëveshjeve të Brukselit nga regjimi i presidentit të Serbisë, Aleksandar Vuçiq.
“Institucionet e Serbisë po ua mohojnë në mënyrë sistematike qasjen anëtarëve të familjeve të qytetarëve të Kosovës të mbajtur aktualisht në qendrat e paraburgimit në Serbi me pretekstin se ata nuk i njohin ID-të e Kosovës. Kjo është shkelje e marrëveshjeve të Brukselit dhe e të drejtave themelore të njeriut nga regjimi i Vuçiqit”, shkroi ai.
Marrëveshja e Ohrit, ofron njohje reciproke të dokumenteve dhe simboleve kombëtare, si: pasaportat, diplomat, targat, vulat doganore.
Ndryshe, ministrja e Drejtësisë në Kosovë, Albulena Haxhiu ka kërkuar nga homologia e saj serbe, transferimin e Nezir Mehmetaj dhe Petrit Dula në Kosovë pasi ata po mbahen në Serbi.
Haxhiu kishte thënë se Mehmetaj dhe Dula po mbahen në Serbi mbi pretendimet për kryerjen e krimeve të luftës kundër popullatës civile në Kosovë gjatë vitit 1999.
Ajo kishte theksuar se mbajtja e tyre në Serbi është shkelje e të drejteva të njeriut.
“Z.Mehmetaj dhe z.Dula janë qytetarë të Kosovës pra edhe nën mbrojtjen e Republikës. Procesi i deritanishëm ndaj dy qytetarëve të Republikës së Kosovës është i përbërë nga shkelje të rënda të të drejtave të njeriut, për vite të tëra. Çdo akuzë ndaj tyre për krimet e pretenduara, duhet trajtuar nga organet e drejtësisë në Republikën e Kosovës”, kishte shkruar Haxhiu në facebook.
Në nëntor të viti të kaluar, Gjykata e Lartë në Beograd ka dënuar me dy vite burg Petrit Dulën për pjesëmarrje në rrahjen e një civili në Kosovë në vitin 1999.
Ndërsa Nezir Mehmetaj nga komuna e Klinës tash e dy vjet është arrestuar në pikën kufitare në Merdare nën dyshimet për krime lufte dhe që prej asaj kohe po qëndron në paraburgim në Serbi.
Mehmetaj akuzohet nga Serbia për përfshirje në vrasjen e shtatë personave dhe djegien dhe plaçkitjen e shtëpive në Rudicë si anëtar i Ushtrisë Çlirimtare të Kosovës.
