Deputetja e PDK-së, Blerta Deliu-Kodra ka bërë një reagim pasi sot janë bërë 15 vjet nga miratimi i Kushtetutës së Republikës së Kosovës.
Ajo teksa kujtoi këtë ditë të rëndësishme për Kosovën, përmendi edhe një deklaratë të kryeministrit Albin Kurti, i cili sa ishte në opozitë thoshte se kush e shkel kushtetutën është “super-kriminel”.
“Sot 15 vjet më parë u ratifikua Kushtetuta e Republikës së Kosovës, akti më i rëndësishëm juridik në vend. Të gjithë ata që shkelin kushtetutën, Albin Kurti i pati quajtur me një term jo fort të lehtë “Kush e shkel ligjin është kriminel, ndërsa ata që e shkelin kushtetutën janë super-kriminel”, ishte përshkrimi i Kryeministrit”, shkroi ajo në Facebook.
Sipas saj, Qeveria Kurti “do të mbetet në historinë politike të Kosovës si qeveria që u tregua shumë herë e “pamëshirshme” ndaj Kushtetutës”.
“Ishte pikërisht ky kryeministër bashkë me ekipin e tij që “vunë këmbën” shumë herë mbi Kushtetutën e Kosovës”, shtoi ligjvënësja opozitare.
