Deputetja e Partisë Demokratike të Kosovës (PDK), Ganimete Musliu, ka kërkuar nga Zyra e Rregullatorit për Energji (ZRrE) që t’i lirojë nga pagesa e rrymës veteranët dhe invalidët e luftës së Ushtrisë Çlirimtare të Kosovës (UÇK).
Musliu theksoi se Qeveria i ka lënë kategoritë e dala nga lufta ‘pas dore’, duke u detyruar që të vjedhin rrymën dhe të futen në burg, shkaku i pamundësisë për ta paguar faturën.
“Kategoritë e dala nga lufta janë lënë pas dore nga Qeveria në çdo aspekt madje duke u lënë anash edhe në Ligjin e Pagave, duke mos u futur as në ligjin e pagës minimale. Kërkoj nga ZRrE që t’i lirojë nga pagesa këtë kategori. Është e papranueshme dhe e pamëshirshme që të shohësh prangosjen e veteranëve vetëm pse nuk kanë mundësi të paguajnë rrymën, ashtu siç ishte Besim Musa nga Mitrovica”, tha deputetja.
Ajo përmendi Mitrovicën e Veriut, qytetarët e së cilës nuk paguajnë rrymën, për të cilën tha se ky është diskriminim për qytetarët e Mitrovicës së Jugut.
“Ky shtrenjtim i rrymës në kohën kur qytetarët po ballafaqohen me luftën për ekzistencë është e papranueshme. Ky shtrenjtim nuk i prek qytetarët e Mitrovicës së Veriut, të cilët nuk kanë nevojë të paguajnë rryme. Ky është diskriminim me qytetrarët e jugut të Mitrovicës”, tha ajo
