Njohësi i çështjeve politike, Ardian Arifaj, ka thënë se kryeministri i Kosovës, Albin Kurti dhe vetë qeveria e tij kanë evoluar në misionin e themelimit të Asociacionit.
Analisti thotë që Kosova e ka përbirë punën e Asociacionit, ku sipas tij, nuk është më temë se a bëhet, por si do të bëhet.
“Kemi parë një evoluim politik të vetë kryeministrit Kurti, por edhe të partisë Vetëvendosje, e cila sot e ka qeverisjen, pushtetin. Nga një parti, e cila e patë bërë prej misioneve të veta pengimin e themelimit të Asociacionit, u kthye në një parti dhe në një kryeministër, e cila e pranojë Asociacionin ose me u shpreh siç u shprehet disa evropianë diplomatë, faktikisht Kosova e ka përbirë punën e Asociacionit, pra Asociacioni nuk është më temë se a bëhet a nuk bëhet, por tema tash është se si do të bëhet”, ka thënë Arifaj në emisionin “Info Nata”.
Ish-këshilltari i ish-presidentit të vendit, Hashim Thaçi, ka thënë se zëvendëskryeministri i Kosovës, Besnik Bislimi, e ka konfirmuar themelimin e ekipit menaxhues që do ta draftojë statusin e Asociacionit.
“Edhe zëvendëskryeministri i Kosovës e tha me një intervistë që deri tash pritet të themelohet ekipi menaxhues që do ta draftojë statusin e Asociacionit, pastaj të punohet në ndërtimin e Asociacionit”, ka thënë ai.
Sipas Arifajt, Kosova nuk mund të ecë përpara pa ndihmën e aleatëve ndërkombëtarë.
“Kosova nuk mundet pa aleatët, do të thotë asnjë shtet në botë nuk mundet pa aleatët e vetë dhe prandaj është me rëndësi që të punohet me aleatët, të ju besohet. Përparësi e kësaj është që pa hyrë në historinë e afërt që e kemi me Rambujen apo Vjenën. Mjafton të shikohen në çka janë ndërtuar këto aleanca”, shtoi analisti.
