Shoqata e Matematikanëve të Kosovës i është mohuar që të marrë pjesën në Olimpiadën Matematike Ballkanike për shkak të Serbisë.
Në njoftimin e tyre thuhet se përfaqësuesit e Serbisë nuk e respektojnë marrëveshen mes Kosovës dhe Serbisë të arritur në Ohër.
“Më datën 27 mars 2023, Shoqata e Matematikanëve të Kosovës ka aplikuar në MASSEE (The Mathematical Society of South Eastern Europe) për t’ua mundësuar pjesëmarrjen nxënësve të Kosovës në Olimpiadën Matematike Ballkanike (shih kërkesën e bashkangjitur). Kosova ka tentuar të anëtarësohet në MASSEE edhe më parë, por për fat të keq, kërkesat tona vazhdimisht janë refuzuar për shkak të qasjes bllokuese të përfaqësuesve të Serbisë në MASSEE.”
“Shoqata e Matematikanëve të Kosovës ka aplikuar këtë vit në MASSE me shpresë se do të respektohet marrëveshja e fundit mes Kosovës dhe Sërbisë, ku saktësisht thuhet se Serbia nuk do të pengojë pjesëmarrjen e Kosovës të anëtarësohet në asnjë organoizatë rajonale apo ndërkombëtare. Por për fat të keq, përfaqësuesit e Serbisë refuzojnë ta respektojnë këtë marrëveshje ani pse Bashkimi Evropian është garantues i zbatimit të saj.” – thuhet në reagimin e tyre.
Ndërkohë, kjo shoqatë ka publikuar edhe komunikimin me përfaqësuesit e Serbisë, të cilët kanë thënë se janë kundër marrëveshjes së Ohrit.
“Të nderuar miq, Me shqetësim të madh morëm letrën e koleges sonë të dashur Valdete Rexhëbeqaj – Hamiti, e cila është në vazhdim. Para së gjithash, lista e vendeve të ftuara për BMO2023 tashmë është rënë dakord nga të gjithë anëtarët e MASSEE dhe është finalizuar, kështu që ne nuk shohim mundësinë për ta ndryshuar atë, cilado qoftë arsyeja. Së dyti, duam të theksojmë gjithashtu se dokumenti i cituar nga Valdete (sipas titullit të dokumentit, është një propozim, i papranuar zyrtarisht) nuk gjeneron asnjë ndryshim në marrëveshjet tona në MASSEE. Nëse bëhet fjalë për përfshirjen e provincës së Serbisë, Kosovës dhe Metohisë në garën BMO (dhe të gjitha garat tjera), atëherë ne jemi kundër propozimit. Nga këndvështrimi i Serbisë, Kosova* nuk është shtet (i njohur nga OKB). Pjesëmarrësit nga krahina e Kosovës dhe Metohisë janë gjithmonë të mirëpritur në procesin e garave matematikore përmes olimpiadave matematikore serbe. Kjo mundësi ka qenë (madje ka pasur shembuj të veçantë në periudhën paraardhëse) dhe është ende e hapur për të gjithë të rinjtë, studentë të mirë të matematikës nga ajo zonë, dhe ne do t’i mbështesim me kënaqësi.” – thuhet në letrën e përfaqësuesve serb.
Pas kësaj, përfaqësuesit e Kosovës kanë thënë se do të njoftojnë Bashkimin Evropian për mosrespektim të marrëveshjes.
