Kombëtarja e Kosovës U21 këtë muaj do ta shfrytëzojë për t’i zhvilluar dy ndeshje miqësore, në mënyrë që të përgatitet sa më mirë për ndeshjet kualifikuese për Evropianin ‘Sllovakia 2025”.
‘Shpresat’ e Kosovës do të luajnë kundër Moldavisë U21, më 24 mars në Antalya dhe më pas kundër Turqisë U21, më 27 mars në Alanya.
Në mesin e futbollistëve të grumbulluar nga trajneri Tovërlani është edhe Rilind Hetemi, futbollisti që premton të ardhme të ndritur tek “Dardanët”.
Hetemi ka lindur dhe është rritur në Gjermani, ka luajtur poashtu për grupmoshat U15 dhe U16, megjithatë ka vendosur që ta përfaqësojë vendin e tij të origjinës, Kosovën
Në një prononcim për ‘GazetaBlic Sport’ nga Turqia, Rilind Hetemi tha se është gjithmonë i lumtur kur është pjesë e grumbullimeve tek Kosova dhe që qëllimi i tij është që të bind me paraqitjet e tij.
Natyrisht, ai tha se është një ëndërr e madhe që një ditë të jetë pjesë e Kosovës A, por që duhet punohet shumë për të arritur deri aty.
“Sigurisht që jam gjithmonë shumë i lumtur kur mund të luaj për Kosovën dhe do të bëj maksimumin për të fituar besimin. Para së gjithash, synimi im është të bind tek U21 dhe të hedh më pas hapat e mëtejshëm. Por sigurisht që secili prej nesh ka ëndrrën e madhe për të qenë një ditë pjesë e kombëtares A”, tha ai.
