Gati një muaj me vonesë, duket se e ka festuar pavarësinë e Kosovës ambasada e vendit në Arabinë Saudite.
Përmes një njoftimi në Facebook, Ambasada në Riad ka bërë të ditur se ka organizuar pritje, komunikatë kjo që është publikuar sot, vetëm shtatë ditë para se të bëhen një muaj nga 15 vjetori i pavarësisë.
“Në fjalën e tij para të pranishmëve, ambasadori i Republikës së Kosovës, Lulzim Mjeku tha se udhëtimi i Republikës së Kosovës drejt lirisë, pavarësisë dhe shtetësisë, ishte i gjatë, i vështirë dhe me shumë pengesa.” – thuhet mes tjerash në këtë komunikatë.
Njoftimi i plotë:
Ambasada e Republikës së Kosovës në Riad organizoi pritje për nder të Ditës së Pavarësisë
Për nder të 15-vjetorit të Pavarësisë së Kosovës, Ambasada e Republikës së Kosovës në Riad ka organizuar pritje zyrtare, ku të pranishëm ishin Shkëlqesia e Tij Dr. Faisal bin Abdul-Aziz Al-Sudairy, nënsekretar i Provincës së Rajonit të Riadit,
Drejtori i Departamentit të Përgjithshëm për Çështjet e Trupit Diplomatik në Ministrinë e Punëve të Jashtme, Ambasadori Abdullah Al-Rashid, zëvendësministri i Brendshëm i Mbretërisë së Arabisë Saudite, anëtarë të trupit diplomatik të akredituar në Arabi Saudite si dhe përfaqësues të organizatave ndërkombëtare.
Në fjalën e tij para të pranishmëve, ambasadori i Republikës së Kosovës, Lulzim Mjeku tha se udhëtimi i Republikës së Kosovës drejt lirisë, pavarësisë dhe shtetësisë, ishte i gjatë, i vështirë dhe me shumë pengesa.
Ambasadori u shpreh krenar që përfaqëson një vend evropian që është i përkushtuar ndaj paqes e përparimit njerëzor dhe që është një gurthemel i stabilitetit në Evropën Juglindore.
Mjeku po ashtu theksoi se #Kosova15, është një histori suksesi për arritjet që Republika e Kosovës ka bërë në këto vite të shtetësisë si në fushën e sportit, kulturës, shkencës dhe zhvillimit ekonomik.
