Ka përfunduar me rezultatin e thellë 4 me 1, përballja në “Old Trafford” mes Manchester United dhe Real Betis, me “djajtë e kuq” që praktikisht janë të kualifikuar për në raundin e radhës të UEFA Europa League.
Goli i parë do të vinte që në minutën e 6’-të, ku pas një rrëmuje në zonë Marcus Rashford “rrëmben” topin dhe e çon pas shpatullave të portierit Claudio Bravo duke i dhënë “djajve” avantazhin, mirëpo nuk do të mbaronte me kaq pjesa e parë me spanjollin Ayoze Perez që shtangu portierin De Gea, në minutën e 32’-të të sfidës me një goditje potente nga cepi i zonës.
Me nisjen e pjesës së dytë United nuk vonoi dhe gjeti 2 herë rrugën e rrjetës brenda 6 minutash. Fillimisht në minutën e 52’-të falë brazilianit Antony dhe më pas Bruno Fernandes në minutën e 58’-të. Për të “hipotekuar” rezultatin 4 me 1 mendoi hollandezi Weghorst në minutën e 84’-të.
Me arritjen e këtij rezultati “djajtë” shkojnë në ndeshjen e kthimit thjesht për formalitet. Ndërkaq, kujtojmë se përballja e radhës do të zhvillohet mbrëmjen e 16 marsit.
