Mbrëmja e djeshme ishte e kobshme për familjen Bujupi nga fshati Arllat i Drenasit. Djali i familjes, Eduardi, humbi jetën tragjikisht në moshën 19-vjeçari si pasojë e një aksidenti të rëndë në trafik. Ndonëse u dërgua me urgjencë në spital, i riu nuk arriti që t’i përballojë plagët e marra, raporton Gazeta Sinjali.
Familjarë, miq e të afërm do mblidhen nesër për t’i dhënë lamtumirën e fundit Eduardit.
Sipas njoftimit të familjes, ceremonia mortore do mbahet në varrezat e fshatit Arllat në orën 14:00.
“Me pikëllim të thellë e zemër te thyer ju njofrojmë se pas një aksidenit të ndodhur mbrmë dhe plagëve të marra më i dashuri jonë Edi- Eduart Raif Bujupi sot në mëngjes ndrroj jetë! Vorrimi i të ndjerit bëhet nesër me 16.02.2023 ne ora 14:00, në vorrezat e fshatit Arllat”, thuhet në njoftim.
Ndryshe, shoferi që dyshohet se ka shkaktuar aksidentin e rëndë, pasi ka goditur me veturë të riun, ishte larguar me shpejtësi nga vendi i ngjarjes.
Por pas veprimeve hetimore, i njëjti është identifikuar dhe është arrestuar sot.
Me urdhër të prokurorit, shoferi është dërguar në mbajtje.
