Incidentet me fatalitet në vendet e punës, në sektorë të ndryshëm nuk janë të rralla. Punëtorët shpesh përfundojnë në spital si pasojë e lëndimeve që marrin nga kushtet e këqija, por ka edhe raste aksidentale. Një ngjarje e tillë ka ndodhur sot në fshatin Lubizhdë të Prizrenit, raporton Gazeta Sinjali.
Burimet e Sinjalit brenda Emergjencës së Qendrës Kryesore të Mjekësisë Familjare në Prizren kanë bërë me dije se një 38-vjeçar është dërguar në këtë qendër me urgjencë pasi kishte marrë lëndime në vendin e tij të punës.
Viktima kishte pësuar lëndime në gishtat e dorës, teksa po punonte në vendin e tij të punës, në Zdrukthëtarinë “Hoti” te tranziti i vjetër, por gjendja e tij shëndetësore është stabile dhe i njëjti ndodhet jashtë rrezikut për jetë.
Si rezultat i denoncimit, në vendin e ngjarjes kanë dalë njësitë policore edhe inspektorët e punës të cilët kanë kryer ekzaminimet e nevojshme.
Me urdhër të Prokurorit të Shtetit rasti është iniciuar si “Lëndim aksidental”, teksa veprimet e tjera do të ndërmerren nëse konstatohet se kushtet e punës nuk kanë qenë të mira.
