Kryetari i Shoqatës “Miqtë e Amerikës”, Agim Rexhepi, ka thënë se raportet ndërmjet këtyre dy shteteve nuk janë aq të mira. Ai thotë se ekziston plasaritje ndërmjet Kosovës dhe ShBA-së, raporton Ekonomia Online.
Rexhepi tha se mosftesa e krerëve të Kosovës në Shtëpinë e Bardhë për kaq vite, tregon për raportet e tyre.
Në një intervistë për Ekonomia Online, Rexhepi e ka përmendur edhe takimin e nesërm të thirrur nga Ambasada Amerikane në Kosovë.
“Mendoj që po dhe ajo vërehet botërisht plasaritjet. Vetë fakti që institucionet më të larta kredibile prej marrjes së kësaj nemoglatures së re, mosftesat e tyre në Shtëpinë e Bardhë dhe në takimet e niveleve të larta nga ana e SHBA-së, kanë treguar se nuk është ajo çfarë do duhej të ishte. Mosftesa e takimit të fundit që mbahet nga Ambasada Amerikane për kryeministrin, tregon shumë për ata që lexojnë mes rreshtave se veprimet e institucioneve amerikane ndaj personaliteteve të caktuara, tregon se ka moskoordinim”, u shpreh Rexhepi.
Ai ka pasur kritika edhe për diplomacinë e Kosovës ndër vite. Tha se Kosova nuk ka qenë vigjilentë me përfaqësuesit e saj në arenën ndërkombëtare.
“Kosova nuk e ka luksin e as nuk do ta ketë kurrë. Sikurse gjithë qytetarët do duhej ta kishim një shtet superfuqi, do donim ta kishim shtetin në një pozicion shumë të fuqishëm politik, dhe të ndikonim në krijimin e politikbërjes në arenën ndërkombëtare, por nuk e kemi. Që nga themelimi i shtetit të Kosovës, janë bërë shumë gabime të caktuara dhe unë mendoj se nuk kemi qenë vigjilent për veprimet e institucioneve në krijimin e një politike të fuqishme, me të cilin do ta fuqizonim pozicionin e shtetit të Kosovës, dhe të kemi përfaqësues adekuatë në vendet të caktuara të diplomacisë kosovare”, tha tutje Rexhepi.
Po ashtu ai shtoi se Shtetet e Bashkuara të Amerikës kanë kontribuar shumë për shtetin tonë duke investuar në arsim, siguri dhe çdo gjë tjetër.
“Më shumë se 80 për qind e personaliteteve më të fuqishme e kredibile amerikane e duan Kosovën e institucionet tona, dhe janë të interesuar t’i dërgojnë proceset përpara. Sikurse të mos ishte ky fakt, nuk do ta fillonin intervenimin e forcave shumëkombëshe ndaj ish-Jugosllavisë për të krijuar shtetin e Kosovës, nuk do të ishin sponsorizues të krijimit të shtetit të Kosovës”, u shpreh Rexhepi.
