Për gati dy vjet qeverisje në mandatin e dytë, Qeveria e Albin Kurtit nuk i ka rënë shumë të përdorë gërshërët për të prerë shirita në përurimin e ndonjë projekti të madh.
“Sukseseve titanike” të Kurtit, pas urës së fshatit Saradran, sot iu shtua edhe një park me një tavolinë pingpongu në fshatin Gjurkoc të Shtimes.
Për këtë sukses, na njoftoi kryetari “çlirimtar” i Shtimes, Qemajl Aliu.
Ndonëse ai tha se ky park ka edhe këndin e lojërave, në fotografitë e publikuara shihet vetëm një tavolinë për lojën e pingpongut.
“Nder i veçantë ta presim për vizitë Kryeministrin e Republikës z.Albin Kurti dhe ministrin e MAPL-së z.Elbert Krasniqi, ku bashkarisht përuruam Parkun dhe këndin e lodrave në Gjurkoc. ?♂️ Nën shoqërinë e fëmijëve që i gëzohen më së shumti këtij parku, mësimdhënës e banorë të fshatit, përuruam projektin e realizuar në bashkëfinancim mes MAPL-së dhe Komunës së Shtimes.”, ka shkruar Aliu.
Ky park në lagjen e komuniteteve, sipas Aliut, ka sipërfaqe prej 2.200m², 70% hapësira gjelbëruese, me 570 pemë të mbjella, 9 lloje të ndryshme të lodrave, 52 shtylla ndriçimi, parking për vetura dhe 330m² shtigje për ecje.
“Falenderojmë kryeministrin Kurti që na nderoi me prezencën dhe ministrin Krasniqi për angazhimin në realizimin e këtij projekti me rëndësi për gjithë banorët e fshatit Gjurkoc. #bashkëvazhdojmë ?”, ka shkruar Aliu.
