Policia e Kosovës ka njoftuar se dje janë sulmuar katër persona fizikisht në sheshin “Car Llazar”, në Mitrovicën Veriore.
Për rastin është deklaruar Prokuroria Themelore në Mitrovicë, e cila ka treguar për Gazetën Insajderi se “të dyshuarit që kanë sulmuar dhe u kanë shkaktuar lëndime të dëmtuarve ende nuk janë identifikuar”.
”
Lidhur me rastin nga policia është njoftuar Kryeprokurori i Prokurorisë Themelore në Mitrovicë z. Ismet Ujkani, i cili ka udhëzuar policinë që rasti të hetohet, dhe të ndërmerren të gjitha veprimet hetimore për ndriçimin e këtij rasti, rasti është duke u hetuar nga policia në koordinim me PTH në Mitrovicë”, thuhet në njoftimin e Prokurorisë Themelore të Mitrovicës për Gazetën Insajderi.
Ndërkohë dy nga të rinjtë e sumuar kanë marrë trajtimin e duhur në Spitalin e Përgjithshëm në jug.
Doktoresha Luljeta Zhubi nga Spitali i Përgjithshëm në jug, ka treguar për Gazetën Insajderi mbi gjendjen shëndetësore të tyre.
“Policia i ka sjell dje dy persona në spital, kanë pas lëndime nga goditjet që kanë marrë – njëri në kokë, dhe tjetri në hund”, ka thënë ajo për Gazetën Insajderi.
“Pasi e kanë marrë ndihmën e parë, të dy janë liruar për trajtim në shtëpi, pasi nuk kanë pasur nevojë për hospitalizim”.
Ndërsa rasti në polici është hapur si “lëndim i rëndë trupor”.
“Katër viktimat meshkuj kosovar kanë raportuar se janë sulmuar fizikisht nga persona të panjohur. Dy nga viktimat kanë pranuar tretman mjekësor”, ka bërë të ditur policia në raportin 24 orësh.
