Ish-ministri i Financave, Avdullah Hoti, ka thënë se me terma real buxheti i Kosovës për vitin 2023 do të jetë më i ulët sesa në vitin 2022.
Ai ka thënë se buxheti i prezantuar nga Qeveria 3.2 miliardë është për shkak të inflacionit.
“Për shkak të inflacionit prej rreth 20% për produkte të konsumit bazik, buxheti nominal për vitin 2023 prej 3.2 miliardë euro, është në fakt rreth 2.5 miliardë euro në terma real. Rrjedhimisht, ky buxhet në terma real është më i ulët se për vitin 2022 për së paku 300 milionë euro (sivjet ka qenë 2.8 miliardë euro)”, ka shkruar Hoti në Facebook.
Deputeti i Lidhjes Demokratike të Kosovës (LDK), po ashtu ka thënë se me 100 euro sot blihet më pak krahasuar me vitin e kaluar.
“Krahasojeni vetë sasinë e mallrave që e keni blerë vitin e kaluar me 100 euro, me sasinë e mallrave që mund të blini sivjet me ato 100 euro. Do të vini në këtë përfundim”, ka thënë ai.
Qeveria e Kosovës e ka votuar projektligjin për buxhetin i cili do të jetë 3 miliardë e 212 milionë euro.
Por opozita thotë se buxheti është në të dhëna nominale e jo reale.
