Njëzetekatër orëshi i fundit përshkruan krejt në çka është kthyer Kryeministri Kurti këto vjet. Dje, kur një pjesë e shtypur e shoqërisë marshonte për barazi, ai u shfaq te selia e Eulex-it. Në mbrëmje kërcente në stadium, në përkrahje të Kombëtares së Kosovës. Pra, gjendej pranë gjithçkaje që ka sabotuar dhe injoronte një komunitet të diskriminuar. Siç e do shumica.
Kujtdo që i ka ikur performanca e Kryeministrit Kurti në Klan Kosova pas ndeshjes së Kombëtares së Kosovës, ka humbur shumë. E analizonte lojën me kompetencë të trajnerit Ismet Munishi, por ishte shumë më i emocionuar. Në mediumin, që gjatë e bojkotoi, propozonte që mikrofonët të testoheshin me “3,2; 3,2”, demek me rezultatin e fitores së kombëtares së Kosovës.
Pas golave që lojtarët kosovarë i shënonin kundër Irlandës Veriore, publikoheshin videot ku Kryeministri Kurti po kërcente në stadium. Ishte në pjesën “VIP” të tribunave. Meqë ra fjala, më herët, kur nisi t’i shikonte ndeshjet e Kosovës, Kryeministri ulej në pjesën lindore të stadiumit, ku shiten biletat më të lira, e tallej me pjesën “VIP” të stadiumit. Thoshte se ka dëgjuar se aty mund t’ia vjedhin kuletën. Nuk dihet për fatin e kuletës së Kryeministrit, që lojën e shikoi krah kryetarit kontrovers të Federatës së Futbollit, Agim Ademi.
Kur përfundoi ndeshja, Kurti tregoi se është kthyer në tifozin e flaktë të Kombëtares.
“Ndeshje më të bukur, unë moti s’kam parë”, nis fjalën e tij në Klan, për të analizuar më tej lëvizjes e futbollistëve. Pasimet, siç thoshte ai, precize, i kishin pëlqyer më së shumti.
Historia e tij me refuzimin e çdo gjëje kosovare, deri te përfaqësuesja në futboll, mund të mos ketë fare nevojë për ndonjë rikujtim. Kurtit vazhdimisht i publikohen fotografi e video, që i dëshmojnë ndërrimin e qëndrimeve të tij.
Kryeministri mbrëmë ishte i vetëdijshëm edhe se duhet një stadium më i madh se ai i Prishtinës, sepse dëshira për ta ndjekur Kombëtaren është shumë e madhe.
Kaq fat, sa djemtë e Kombëtares, nuk pati komuniteti LGBTQI, për ta siguruar prezencën në Paradën e Krenarisë, të Kyeministrit me bindje të majta, i deklaruar si besimtar i rryer i barazisë.
Për të dytën herë radhazi, Kurti, si Kryeministër, nuk mori pjesë në paradën e krenarisë. Edhe pse kishte ftesë madje. Njëjtë edhe Presidentja Osmani, nga e cila nuk pritet të veprojë ndryshe prej Kurtit për ndonjë ngjarje.
Ndryshe prej, ta zëmë, deputetit Eman Rrahmani apo deputetit Mërgim Lushtaku, Kurti nuk beson se komunitetit LGBTQI+ duhet t’i mohohen të drejtat e barabarta me qytetarët e tjerë. Në fakt, Kurti ka treguar se ai beson fuqishëm në të drejtat e tyre, kur është pyetur për këtë temë.
Ai u ka kërkuar edhe deputetëve të Kuvendit të Kosovës ta votojnë draftkodin civil, në një nen të së cilit, i hapej rruga rregullimit të bashkësive civile të personave të së njëjtin seks. Nuk iu binden një grup i deputetëve, të cilët në fakt ishin konsistentë në qëndrimet homofobe, të cilat Kurti i kishte ditur edhe para se t’i pranonte në parti.
Sipas raporteve të para disa vjetëve, Kosova llogaritej të jetë vendi më homofob në rajon. Dhe, Kryeministrit duket se e ka këtë matje në kalkulimet e veta. Postimet në përkrahje të komunitetit LGBTQI+ i ka bërë kryesisht në Twitter. Audiencës së tij të gjerë në Facebook është kujdesur t’i servojë gjëra të tjera.
