Gazeta Sinjali raportoi sot për arrestimin e një personi në Ferizaj, i cili dyshohet se është recidivist i veprës penale “dhunë në familje”. I dyshuari ia bëri ‘gropën vetes’ duke e denoncuar gruan e tij, por që përfundoi vet i prangosur.
Burimet e Sinjalit nga Prokuroria kanë bërë të ditur se burri që u arrestua është Zekirja Alidema, 26-vjeçar, i cili tashmë ndodhet në mbajtje për 48 orë, me aktvendim të Prokurorit të Shtetit.
Por kjo nuk është hera e parë që Alidema është në telashe me shtetin. Edhe në vitin 2020 ai kishte përfunduar në Polici për dhunë në familje ndaj bashkëshortes së tij.
Detajet e rastit të fundit
I dyshuari fillimisht është paraqitur në Polici me ankesën se bashkëshortja e tij ka krijuar probleme, pasi ai i ka kërkuar asaj që të ndahen dhe të largohet nga shtëpia ku jetonin bashkë.
Pasi rasti u denoncua, njësitet policore e kanë shoqëruar në stacion bashkëshorten e tij, e cila ka bërë të ditur se në fakt ajo ka përjetuar dhunë fizike nga bashkëshorti i saj, i cili e ka rrahur me grushte dhe me bisht fshese.
Si pasojë e lëndimeve që ka marrë nga dhuna, gruaja ka pranuar edhe tretman mjekësor.
Kujtojmë se rastet e dhunës në familje çdo ditë e më shumë po shtohen në Kosovë, ku viktimat më të shpeshta janë gratë të cilat përjetojnë dhunë psikike e fizike kryesisht nga bashkëshortët e tyre.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
