Prokuroria Themelore në Mitrovicë ka kërkuar caktimin e paraburgimit për policin A.R., i cili po dyshohet se ka thyer kamerat e laboratorit të drogës në Zveçan.
Prokuroria thotë se sipas fakteve dhe provave të siguruara, ekziston dyshimi i bazuar se polici i Njësisë për Reagim të Shpejtë, derisa ka qenë në detyrë të sigurimit të vendit të ngjarjes në objektin biznesor në fshatin Izvor, komuna e Zveçanit, me pronar i dyshuari S.N., i ka dëmtuar kamerat e sigurisë që kanë qenë të vendosura në objektin ku është kryer kontrollimi dhe është gjetur laboratori për prodhimin e substancave narkotike si dhe janë gjetur 10 mijë bimë narkotike të llojit marihuanë.
Me veprimet e tij, A.R dyshohet se ka kryer veprat penale “Keqpërdorimi i pozitës apo autoritetit zyrtar” dhe “Dhënia e ndihmës kryesve pas kryerjes së veprave penale”
I dyshuari me vendim të prokurorit është ndaluar për 48 orë.
Seanca për caktimin e paraburgimit pritet të mbahet para gjyqtarit të procedurës paraprake të Gjykatës Themelore në Mitrovicë.
