Beteja për Anthony Albanesen, grekët e duan për vete australianin që u shpall shqiptar në vikend

Kur mes shqiptarësh u konstatua se vetë mbiemri i Kryeministrit të ri australian, Anthony Albanese, po e tregon prejardhjen e tij, një medium grek ka shkruar se origjina e Albaneses në fakt, “lidhet me Greqinë”. Çka thoshte Albanese për mbiemrin e vet në vitin 2019?


Opozitari që i fitoi zgjedhjet në Australi, Anthony Albanese, është Kryeministri i parë australian, mbiemri i të cilit nuk është anglisht.

Ajo që dihet zyrtarisht për Albanesen është se nëna e tij ka qenë australiane me origjinë irlandeze, ndërsa babai i tij, Carlo Albanese, vinte nga rajoni Apulia në Itali. Ky rajon, që shtrihet në brigjet e Adriatikut, është më i afërti me pjesën bregdetare të Shqipërisë, shkruan Gazeta Express.

Mbiemri i kryeministrit të ri australian, në italisht i bie “shqiptar” dhe, britanikja The Guardian shkruan se ky term në Italinë jugore përdoret për të përshkruar një të ardhur nga Shqipëria.

Në Kosovë, për këtë çështje e ka dhënë një version të tij, Prindon Sadriu, burri i Presidentes Vjosa Osmani, i cili ka jetuar në Australi.

“Një kandidat me rrënjë shqiptare, Anthony Albanese, mund të jetë kryeministër i ardhshëm i Australisë”, shkroi të shtunën Sadriu.

Mbiemri i Albaneses është bërë temë edhe për mënyrën se si ai duhet të shqiptohet. Në Australi raportohet se edhe bashkëpartiakët e tij kanë versione të ndryshme se si duhet thirrur Kryeministri i ri.

Albanese, si deputet në vitin 2019, ishte pyetur se si duhet t’i shqiptohet mbiemri, dhe ai ka thënë “më thirrni ‘Albo’ dhe nuk gaboni”.