Shefja e Grupit Parlamentar të Lëvizjes Vetëvendosje, Mimoza Kusari-Lila, deklaroi se është afruar fundi i ndërhyrjes së Serbisë në karshi shumë proceseve në Kosovë, duke shtuar se reciprociteti me këtë shtet, do të jetë veprim i afërt.
Kusari-Lila deklaroi të enjten në DESK-un e KTV-së se mosdakordimi i Serbisë për asnjë marrëveshje me Kosovën në Bruksel, e paraqet këtë shtet para Bashkimit Evropian si të pavullnetshëm.
“Serbia nuk është dakorduar për asnjërin propozim për gjetje ne zgjidhjes afatgjate për targat, derisa pala serbe gjithashtu s’ka pranuar asnjë afat prej 30 ditësh që kjo të trajtohet prej dy udhëheqësve në negociata. Tash vendimi mbetet të merret nga kreu i shtetit, që do të jetë i bazuar në reciprocitet, por duke reflektuar edhe vullnetin e palës kosovare. Në këtë periudhë kohore duhet të themi që s’ka marrëveshje për targat, është Serbia ajo që e bllokoi”, deklaroi deputetja e VV-së.
Sipas saj, reciprociteti ndaj Serbisë do të diskutohet nga kabineti qeveritar i kryeministrit Kurti.
“Reciprociteti është bazë e veprimit të një shteti. Ky si veprim në të ardhme ne afërt do të shihet edhe nga terreni, edhe nga palët e tjera, strategjike, duke marrë faktin se tashmë s’ka mburojë që mund të fshihet Serbia. Do të bëhet një zgjidhje që do të jetë tranzitore deri në gjetje ne një zgjidhjeje. Unë besoj se po i afrohemi fundit të ndërhyrjes së Serbisë karshi shumë proceseve në Kosovë”.
