Angazhimi në Lëvizjen Vetëvendosje i është shpërblyer edhe shefit të asamblistëve të kësaj partie në Lipjan, Alban Salihut. Kështu, pas KEK-ut, në ciklin e skandaleve të reja të punësimeve politike është “rehatuar” edhe vëllai i tij, Arianit Salihu, i cili është një prej personave të fundit që është punësuar në një institucion shtetëror.
Aktivisti i degës së LVV-së në Lipjan që në zgjedhjet e fundit kishte kandidat për kryetar, Adnan Rrustemin, i cili njihet për afërsinë me ministren Albulena Haxhiu, është rehatuar së fundmi në Shërbimin Korrektues, që është në kuadër të Ministrisë së Drejtësisë, raporton Demokracia.com.
Arianit Salihu figuron i pari në listën e Shërbimit Korrektues të Kosovës, si i punësuar në Qendrën e Paraburgimit në Prishtinë.
Demokracia.com merr vesh se ai është vëllai i Alban Salihut, shefit të asamblistëve të LVV-së në Lipjan.
Arianit Salihu me t’u punësuar, siç duket ka mbyllur të gjitha llogaritë e tij në rrjete sociale, për shkak të raportimeve të mediave lidhur me punësimet e shumta të LVV-së ditëve të fundit, të cilat dikur i kritikonte shumë.
Sidoqoftë, Demokracia.com ka arritur të sigurojë disa fotografi të tij me vëllain, Albanin, ku vërehet se të dy janë përkrahës të LVV-së.
Arianiti, i cili tani ka fituar një pozitë në SHKK, shihet edhe në tubime të ndryshme të LVV-së, derisa për të treguar përkrahjen ndaj Albin Kurtit, dy vëllezërit kishin vendosur edhe një poster të madh në shtëpinë e tyre.
Vlen të përmendet se përveç Salihut, në Qendrën e Paraburgimit në Prishtinë u punësua edhe një militant tjetër i LVV-së për të cilin raportoi Demokracia.com, përkatësisht Liridon Vërbovci.
Veç kësaj, edhe në Qendrën Korrektuese të Dubravës disa prej personave që u pranuan si zyrtarë korrektues janë përkrahës të Lëvizjes Vetëvendosje.
Prokuroria e shtetit dhe Departamenti i Krimeve të Rënda, Njësiti për Krime Ekonomike dhe Korrupsion, ka nisur hetimet lidhur me punësimet e fundit në KEK.
Demokracia.com të dielën ka raportuar për dhjetëra militantë të LVV-së të cilët së fundmi janë punësuar në Korporatën Energjetike të Kosovës. /Demokracia.com/
