Qamil Cahani invalid e luftës kishte treguar se si ishte bartë armatimi nga Cahani i Shqipërisë për në Kosovë. Ai në një emision në Debat Plus kishte treguar detaje interesante.
“Ne kishim lidhje farefisnore me shqiptarët e Hasit të Kosovës, për arsye ekonomike ne merreshim edhe me kolica të cigareve për t’i shitur e për t’i mbajtur familjet tona. Në këto kushte dhe në këto rrethana ne bëhemi njohës të mirë të kufirit dhe zonës, nga fshatrat Gorozhup, Planej, Mazrek e Gjonaj, Krajk, Zym, Romajë e Demjan. Në tetor të 1997 ne bijmë në kontakt me Haki Drenicën, Zeqirin e Qenë Qenën, këta ishin kosovarë të ardhur në Shqipëri për arsye se ata i ndiqte regjimi serb dhe na thojnë neve, “o djem a na ndihmoni për me futë armatim”, ne i tham jemi të gatshëm, okej, kur të doni ju. Në ndërkohë, ka fundi i tetorit ne filluam veprimtarinë për me qitë armatim në Kosovë, në fillim armatimi është stacionu te shtëpia e Gëzim Cahanit, për arsye se ai e kishte vendin e vogël, armatimi stacionohet e Agronit sepse ishte një vend i madh dhe i përshtatshëm. Në fillimet e para kemi qitë nja 30 kuaj armatim dhe në këtë armatim kanë marrë pjesë banorët e fshatit Cahan, pak më vonë e them me përgjegjësi, kemi qitë 149 kuaj armatim, ku janë përfshirë fshatërat Kishaj, Pogaj, Moriq, Lajq, Vlahën, pra nga Vlahna kanë ardhë shumë, kem edhe nga Kruma e nga Fshati Mazrek. Kjo veprimtari që e kemi nis nga fshati Cahan, në fillim e kemi qu në fshatin Planej, ky aty i kemi pas dy djem shumë të mirë Demushi e Rama, që na kanë ndihmu shumë që ta sjellim armatimin drejt Shtabit të Përgjithshëm.
Kjo veprimtari ka fillu njo dy-tre mujë pas sepse korridori ynë po zbulohej, hapej domethënë fronti dhe futën edhe në fshatin Vlahën, të cilët edhe këta e kalojnë këtë armatim nëpër Pashtrik. Pak para nesh që kanë kaluar armatim kanë qenë djemt e Kishaj, Avdiu e dy djemtë e tjerë, dikun me 30 veta e kalojshin armatimin. Armatimin këta djem e kanë quar deri te Ura e Nashevcit“, tregoi ai.
Ai më tutje ka treguar se “me 2 qershor të 1998, ne futemi për Vlahën me 130 ushtarë të gjithë të ardhur nga diaspora, të gjithë këta armatimin e kanë marrë në krah, pas aty me Alush Gradicën e djem tjerë e kemi qu deri në Drenoc, aty kanë qenë baca i madh e baca i vogël, Toni e Mici që janë vrarë e janë dëshmorë, e aty e mbaj mend që armatimin kanë ardhë e kanë marrë; Rexhep Selimi, Hashim Thaçi e Kadri Veseli, për me qu në Likovc ku ishte Shtabi“.
Dhe pikërisht ky person, ishte futur në listat e veteranëve mashtrues nga Ish Prokurori Elez Blakaj.
