Kryeministri vendit, Albin Kurti, ka thënë se sa i përket rezervave të miellit gjendja nuk është keq, por ka mungesë të vajit të ushqimit.
Këto komente, Kurti i bëri gjatë konferencës së përbashkët që pati me kancelarin austriak, Karl Nehammer, teksa shtoi se është shqetësim edhe fakti se mungon edhe vaji i lulediellit, si lëndë e parë që ka ardhur nga Ukraina.
“Sa i përket rezervave të miellit, nuk jemi keq. Kemi mangësi sa i përket vajit të ushqimit. Vaji i lulediellit, lënda e parë e të cilit ka ardhur në masë të madhe nga Ukraina është brengë edhe për vendin tonë në javët e muajt në vijim. Por në raport me furnizimet që i bën në Evropë Federata Ruse, ne nuk jemi të prekur sepse edhe ashtu s’kemi pasur furnizim prej tyre as ndonjë shkëmbim tregtar”, është shprehur Kurti.
Tutje, Kurti përmendi edhe arritjet, që sipas tij, qeveria që ai e udhëheq i ka arritur në 1 vjet qeverisje, duke përfshirë edhe arrestimin e mbi 230 zyrtarëve publik e shtetërorë, me arsyetimin, sipas tij, duke e luftuar korrupsionin.
Ndërsa, gjatë javës së kaluar një vizite në një fabrikë për përpunimin e vajit në Kosovë, Kurti ka thënë se në vend janë edhe rreth 300 mijë litra vaj të papërpunuar, e që sipas tij, pas përpunimit “mjafton për një muaj konsum normal”, teksa ishte zotuar se qe qeveria do të angazhohej që të gjejë burime të lëndës së parë të papërpunuar me shtetet mike.
