Demokracia.com kishte raportuar javë më parë se ministrja e Punëve të Jashtme dhe Diasporës, Donika Gërvalla, kishte braktisur përvjetorin e 14-të të shpalljes së pavarësisë në Kosovë dhe kishte shkuar në Gjermani për t’u siguruar se miku i saj dhe i Listës Guxo, Muhamet Idrizi, të mbajë fjalim në Konsullatën e Kosovës në Hamburg.
E njëjta këtë vizitë e kishte bërë pa e lajmëruar askënd zyrtarisht vetëm me një njoftim që e kishte dërguar përmes aplikacionit “Whatsapp”, shkruan Demokracia.com.
Gramos Begolli, konsull i Kosovës në Hamburg, thotë se kishte menduar se ky lajmërim ishte i rrejshëm, meqenëse s’ishte bërë në mënyrë zyrtare.
“Ka ardhur pa paralajmërim për pavarësinë e Kosovës. Rregullat janë të qarta, por edhe rregullat diplomatike ekzistojnë për të gjitha shtetet ku duhet të sundojë ligji. Në rastin e vizitave në një shtet tjetër, duhet të lajmërohen vizitat e nivelit të lartë. Znj.Gërvalla në bazë të rregulloreve është dashur të lajmërojë këtë vizitë në konsullatë, që ne t’i njoftojmë policinë dhe institucionet. Sepse në momentin kur të arrijë një përfaqësim i lartë, duhet të vijnë autoritetet që të sigurohet itinerari, dhe të sigurohet objekti që të mos ndodhë ndonjë incident”, ka thënë Begolli në T7.
Madje konsulli në ikje, Gramos Begolli thotë se e kishte raportuar këtë numër, i cili e kishte kontaktuar në aplikacionin “Whatsapp”, për shkak që nuk besonte se autore e asaj kërkese është Gërvalla.
Ai tutje ka thënë se në profil kishte një fotografi të një kafshe.
“Si profil i fotografisë, ka qenë një fotografi e një kafshe, nuk e kam marrë shumë serioze kërkesën, dhe nuk kam besuar se autorja e atij profili do të jetë zonja Gërvalla. Kam kërkuar përmes postës zyrtare, mirëpo nuk kam marrë konfirmim, dhe kemi vazhduar të nesërmen. Meqenëse ka qenë situatë me covid, e kemi pasur një numër të caktuar të pranishmëve, hapësirat e konsullatës janë të vogla. Sidomos në pandemi.”
Por, me të arritur në konsullatë, kërkesat e ministres së Punëve të Jashtme, kishin vazhduar. Sipas Begollit, ajo kishte kërkuar nga konsulli që në aktivitetin e organizuar, t’i jepen fjala disa bashkatdhetarëve.
Begolli pretendon që ministrja kishte një qasje hakmarrëse.
“Për çudi, zonja Gërvalla ka kërkuar të ftohen dy bashkatdhetarë, një kryetar i një klubi futbollistik, t’iu kërkohet falje dhe t’ju jepet fjala. Unë jam konsull i përgjithshëm, institucion, i cili nuk ka nevojë që për teke të ministres, të përdoren si mashë për të kërkuar falje dhe për institucionin. Muhamet Idrizi dhe dy persona të tjerë të cilët nuk ishin të ftuar, që për çudi është hera e parë që ministrja paraqitet në konsullatë, asnjëherë nuk kemi pasur me të komunikim, ose për ndonjë ndihmë, sepse gjatë mandatit tim, kam kaluar tre ministra dhe dhjetëra drejtorë, ka qenë mision i vështirë. Me ardhjen e zonjës Gërvalla komplet misioni ka qenë tjetër, sepse gjithmonë ka pasur qasje hakmarrëse mes neve të propozuarit politik dhe këtyre që morën pushtetin”, është shprehur Begolli.
Ai e ka konsideruar qasjen e ministres si joprofesionale dhe shprehet se atij i është mohuar edhe e drejta e fjalës në këtë aktivitet.
