Ai ka thënë se situata në Ukrainë e dëshmon urgjencën e anëtarësimit të Kosovës në NATO dhe BE.
Hoti në Facebook ka shkruar se anëtarët e NATO-s dhe BE-së që ende nuk e kanë njohur Kosovën duhet të ndërrojnë qëndrim bazuar në situatën e krijuar, si dhe Opinionin e Gjykatës Ndërkombëtare të Drejtësisë, duke shtuar se nuk ka vend për qëndrime politike që krijojnë ambiguitet dhe lënë derë të hapur për destabilitet.
“Në 23 vite përpjekje për ndërtim të institucioneve shtetërore, përfshirë 14 vite si shtet i pavarur, Kosova ka dëshmuar se është demokraci e qëndrueshme, që përqafon dhe promovon vlerat perëndimore. Kosova ka arritur stadin e zhvillimit institucional për të dëshmuar se në kapacitetet e veta, jo vetëm që nuk është barrë politike apo financiare për NATO-n dhe BE-në, por i kontribuon stabilitetit dhe zhvillimit rajonal”, ka thënë ai.
Sipas tij, Kosova është e gatshme për anëtarësim në NATO pasi kapacitetet ushtarake të Kosovës janë ndërtuar nën mbikëqyrjen e partnerëve të NATO-s, në një proces që ka qenë historik.
“Në verën e vitit 1999, burra e gra vizionarë të Kosovës e kishin të qartë se çfarë po bënin kur u pajtuan me NATO-n për transformimin e UÇK-së në TMK. (ii) Pas disa vitesh ndërtim të kapaciteteve, u bë avancimi i TMK-së në FSK. (iii) Dhe më 2018, me pakon e ligjeve për ushtrinë dhe planin 10-vjeçar të transformimit në Qeverinë Haradinaj, nisi avancimi i FSK-së në ushtri sipas standardeve të NATO-s. (iv) Këto veprime bënë të mundur që në dhjetor të vitit 2021 në Qeverinë Hoti, Kosova të dërgojë FSK-në në misione paqeruajtëse në krah të ushtrisë amerikane”, ka shkruar ai.
Sipas tij, Kosova është e gatshme për anëtarësim në BE. Ai thotë se nënshkrimi i MSA-së nga Qeveria Mustafa më 2015 dhe zbatimi i saj bazuar në Planin Kombëtar për Zbatimin e MSA-së, Agjendën e Reformave Evropiane dhe Programin e Reformave Ekonomike të vendosura nga Qeveria Mustafa, i kanë mundësuar Kosovës të ndërtojë kornizën ligjore dhe institucionale të krahasueshme me vendet që kanë avancuar në integrim në BE.
Hoti ka shkruar seaArgumenti se BE-ja nuk ka aftësi absorbuese është i pakuptimtë, sepse vetë anëtarët e rinj i zgjerojnë kapacitetet absorbuese të BE-së.
Ai tutje ka thënë se Kosova duhet të ndërmarrë iniciativën në situatën e re të krijuar dhe se Kuvendi duhet të miratojë urgjentisht një rezolutë, ku:
(i) i kërkohet NATO-s dhe BE-së të shqyrtojnë anëtarësimin e Kosovës,
(ii) obligohet Qeveria e Kosovës që, në konsultim me NATO-n, të rishikojë dhe shkurtojë afatet për avancimin e FSK-së në ushtri të rregullt të parapara në planin 10-vjeçar të vitit 2018, përfshirë këtu edhe sigurimin e mbështetjes financiare të nevojshme për këtë qëllim; dhe u kërkohet vendeve të mbetura të BE-së të njohin Kosovën.
