Shefkije Blakaj, është femra e cila ka përfunduar sot në pranga të Policisë së Kosovës në Pejë.
Ajo u arrestua pasi është e dënuar me 12 vjet burg për trafik droge dhe po fshihej nga drejtësia ndërkombëtare prej kohësh.
Burimet e IndeksOnline kanë mësuar së 53-vjeçarja, Shefkije Blakaj, njihet edhe me mbiemrin Tahirsylaj.
Ajo u arrestua nga Njësiti për persona të arratisur (FAST Kosova), shkruan IndeksOnline.
Pak më parë lajmi është konfirmuar edhe nga policia ku thuhet se në përpjekjet e vazhdueshme ligjore dhe profesionale për parandalimin dhe luftimin e veprave penale përfshirë edhe luftimin e kriminalitetit që kalon kufijtë shtetëror, në veçanti identifikimin dhe arrestimin e personave të dyshuar që provojnë t’i ikin drejtësisë, përfshirë edhe drejtësinë ndërkombëtare, Policia e Kosovës përmes Drejtorisë për Bashkëpunim Ndërkombëtar në Fushën e Zbatimit të Ligjit (ILECU), po vepron me kompetencë dhe profesionalizëm duke dëshmuar bashkëpunimin e vazhdueshëm me autoritetet ndërkombëtare për zbatim të ligjit.
Sot me datë 08.02.2022, Policia e Kosovës në rajonin e Pejës, përmes një bashkëpunimi aktiv me Njësitin për persona të arratisur (FAST Kosova), që vepron në kuadër të ILECU-të, të Policisë së Kosovës, dhe bashkërendimit të aktiviteteve ndërmjet autoriteteve kompetente, ka arrestuar të dyshuarën femër (viti i lindjes 1969), e dënuar nga autoritetet norvegjeze për trafikim droge.
Pas konfirmimit të identitetit të saj me vendim të prokurorit kompetent, të njëjtës i është caktuar masa e ndalimit prej 48 orësh për procedura të mëtejme.
