Ishin orët e mbrëmjes të muajit shkurt të vitit 2000 kur shqiptarët e veriut të Mitrovicës në banesat e tyre u sulmuan nga civilët serbë, ku nga ai sulm pati edhe të vrarë.
Në mesin e të vrarëve të asaj nate, kishte fëmijë, gra, burra e pleq të cilët nuk u mbijetuan plagëve të marra.
Njëri nga dëshmitarët e asaj nate, ku bashkëshortja i mbeti e vrarë e vajza e plagosur, tregon momentin kur ishin sulmuar me bomba.
“Bomba e tretë kur ka ra qysh kemi qenë në dhomë i ka rënë shoqes afër trupit krejt zorrët në tokë i ka pasur, vajza pastaj më ka thirrë ka thanë se kam këmbën edhe jam kthy po e preki vajzen, këmbën e kishte por dorën e kisha me gjak”, thotë ai për televizionin publik.
Sulmet nuk u ndalën deri në orët e mëngjesit.
Brenda banesave të shqiptarëve, mes të vdekurve kishte edhe të plagosur të cilët ishin keqtrajtuar.
“25 qytetarë pa dallim moshe gjinie kanë qenë të plagosur me armë zjarri, 93 të tjerë poashtu pa dallim moshe gjinie kanë qenë të keqtrajtuar rëndë fizikisht ku 27-28 në spitalin e Prishtinës ka vdekur Leman Sejdiu dhe Bashkim Rrukeci”, tha Halit Barani nga KMDLNJ-ja.
Deri më sot, sipas Halit Baranit, ishte vetëm një aktakuzë e ngritur ndaj Oliver Ivanoviqit të cilin gjykata e kishte dënuar me 9 vjet burgim, ku më pastaj, ishte rikthyer lënda në rigjykim.
