Kryetari i AAK-së, Ramush Haradinaj ka kërkuar nga institucionet e Kosovën të heqin pajisjet për vëzhgim dhe interceptim të vendosura nga Serbia.
Haradinaj përmes një postimi në Facebook, ka shkruar se ruajtja e fshehtësisë profesionale nga institucionet e rendit dhe sigurisë është shumë e rëndësishme dhe e ndjeshme.
Ky reagim i tij vjen pasi që mbrëmë u raportua se në një aksion të Policisë së Kosovës të realizuar në veri të vendit, dyshohet se kishte rrjedhje të informacionit.
Postimi i plotë:
Ruajtja e fshehtësisë profesionale nga institucionet e rendit dhe sigurisë është shumë e rëndësishme dhe e ndjeshme.
Për këtë arsye, institucionet e sigurisë, veçanërisht Policia e Kosovës duhet të rris kontrollin e brendshëm dhe të veprojë me urgjencë në dy drejtime:
1. Eliminimi i të gjitha pajisjeve për vëzhgim dhe interceptim, të vendosura në territorin e Kosovës nga Serbia dhe aleatët e saj.
2. Investimi në pajisje të avancuara në partneritet me aleatët tonë të sigurisë, për komunikim të sigurt dhe të mbrojtur nga interceptimi i Serbisë dhe i aleatëve të saj.
