Më 16 maj 1999, në rrethana ende të paqarta, u zhduk veprimtari i njohur i Lëvizjes Kombëtare, Ukshin Hoti.
Ukshin Hoti, i lindur më 17 qershor 1943 në Krushë të Madhe të Rahovecit, ishte profesor, filozof, shkrimtar dhe atdhetar i shquar, i angazhuar në çështjen kombëtare gjatë viteve 1981-1999. Ai kishte dhënë ligjërata në disa universitete amerikane, ku edhe kishte studiuar dhe diplomuar.
Për aktivitetet e tij atdhetare, Ukshin Hoti ishte arrestuar disa herë nga regjimi serb, fillimisht i Titos dhe më pas i Millosheviqit. Arrestimi i fundit ndodhi në vitin 1994, kur u akuzua për veprimtari armiqësore ndaj Jugosllavisë dhe për pjesëmarrje në lëvizjen për Republikën e Kosovës. Ai u dënua me pesë vjet burg.
Më 16 maj 1999 pas lirimit dhe daljes nga qelia e burgut të Dubravës, zhduket nga polica serbe pa lënë gjurmë.
Shokët e burgut, ata që kanë shpëtuar nga masakra në Dubravë, disa ditë më vonë kanë treguar se Ukshini ishte liruar nga burgu më 16 maj, ditë e diel, në të cilën nuk praktikohej lirimi i të burgosurve.
Prej asaj kohe e deri tani, atdhetari i përkushtuar Ukshin Hoti edhe sot e kësaj dite konsiderohet i zhdukur../GAZETA PAPIRUS/
