Qytetarët e Kosovës, edhe sot, vazhdojnë të përballen me pasojat e luftës, sidomos në aspektin e shëndetit mendor.Profesionistët shëndetësorë që i trajtojnë këto raste thonë se vetëm gjatë vitit 2024 kanë qenë rreth 3 mijë raste të dhunës në familje, e shumica nga to gra të grupmoshave 20 dhe 30 vjeç.
Gjatë vitit 2024 në Kosovë janë raportuar rreth 3 mijë raste të dhunës në familje. Rritje kjo prej 20% krahasuar me vitin paraprak.Këto shifra tregojnë për një situatë gjithnjë e më shqetësuese në vend, ku gratë përbëjnë 80.6% të viktimave, ndërsa grupmosha më e prekur është ajo midis 20 dhe 30 vjeç.
Valbona Tafilaj, zv/shefe e urgjencës në Klinikën e Psikiatrisë, theksoi se përkundër përmasave të tij shqetësuese, shumë herë mbetet i padukshëm: dhuna brenda familjes.“Kjo dhunë psikologjike, fizike, emocionale apo seksuale lë gjurmë të thella, jo vetëm në trupin e viktimës, por edhe në mendjen, identitetin dhe zhvillimin e saj afatgjatë. Prandaj, është me rëndësi që shëndeti mendor të mos shihet vetëm si pasojë e dhunës, por edhe si fushë kyçe në identifikimin, parandalimin dhe rehabilitimin e saj”, tha ajo, për RTK.
Kurse Faton Kutllovci nga Asociacioni i Psikiatërve të Kosovës tha se “Dhuna në familje në mënyrë më të veçantë është forma më tinëzare e shkeljes së të drejtave të njeriut, sepse ndodhemi në një mjedis që në thelb do të duhej të ishte më i sigurti, shtëpia dhe familja. Shumë nëna, fëmijë dhe të moshuar në Kosovë, jetojnë çdo ditë në frikë, kërcënim e kontroll psikologjik, ndërsa statistikat, edhe pse jo të plota, tregojnë për rritje alarmante të rasteve të raportuara.”Psikiatri Ferid Agani theksoi se lufta në Kosovë ka pasur ndikim afatgjatë në shëndetin mendor të popullatës, prandaj ai e sheh nevojë urgjente rritjen e mbështetjes për shëndetin mendor, si një shtyllë në përballjen me këtë fenomen.
“Investimi në shëndetin mendor, në esencë është në sigurinë shoqërore. Nuk shkon ditë pa e pa një rast të vrasjes, vetëvrasjes, tentim vrasjes dhe tentim vetëvrasjes”, tha Agani.E shpallur nga Asambleja e Përgjithshme e Kombeve të Bashkuara në vitin 1993, Dita Ndërkombëtare e Familjes që shënohet më 15 maj, synon të promovojë ndërgjegjësimin për çështjet sociale, ekonomike dhe demografike që ndikojnë jetën e familjeve në mbarë botën.
