Jennifer Lopez ka zbuluar se binjakët e saj, Max dhe Emme, kanë qenë në qendër të mendjes së saj kur ajo dhe Ben Affleck u vendosën për t’u ndarë.
“Në atë moment u thashë: ‘Ju premtoj që kjo është një periudhë e vështirë, por do ta kaloj dhe do të dal nga kjo më e fortë dhe më e mirë,’” kujton Lopez, 55 vjeçe, në një intervistë për gazetën spanjolle El País, të publikuar të premten.
“U bëra këtë premtim dhe e mbajta. Ata e ndiejnë këtë tani. Kjo më jep një ndjenjë të thellë paqeje në jetën time”.
Artistja e njohur tha gjithashtu se është më “e lumtur” dhe ndjen se është “një hap më përpara” krahasuar me një, dy apo tre vite më parë.
“Jam krenare për veten për këtë dhe krenare që kam arritur t’i udhëheq fëmijët e mi përmes kohëve të vështira, dhe që tani ata janë më të fortë dhe më të mirë për shkak të kësaj”, shtoi ajo.
Lopez – e cila paraqiti kërkesën për divorc nga Affleck, 52 vjeç, në gusht të vitit 2024 pas dy vitesh martesë – pranoi se ka kaluar një vit të vështirë, gjatë të cilit ndodhën gjëra të papritura, përfshirë edhe anulimin e turneut të saj.
“Të gjithë kalojnë periudha të vështira në jetë. Ajo që bën në ato momente është ajo që të përkufizon vërtet,” shpjegoi ajo. “Jo marrëdhënia, jo burri. Ajo që të përkufizon është mënyra si përballesh me përvojat që të vijnë përballë. Unë i përvetësoj ato përvoja – qofshin të mira apo të këqija – dhe i mbart me vete.”
Këngëtarja tregoi se e ka përballuar këtë periudhë të errët përmes leximit, meditimit, introspeksionit, lutjes dhe përqendrimit te fëmijët e saj, tashmë 17 vjeç.
“Gjatë viteve kam bërë terapi individuale, terapi në çift, terapi familjare – kam provuar gjithçka. Jam gjithmonë në kërkim,” u shpreh ajo, duke theksuar se vetënjohja dhe zhvillimi personal kanë qenë prioritete për të.
“Gjatë këtij viti kam hyrë thellë në vetvete për të kuptuar cilat janë modelet që kam ndjekur, pse përsëriten dhe çfarë ka brenda meje që i shkakton ato,” zbuloi Lopez, duke nënvizuar se sot është “më e vetëdijshme për veten”.
Pavarësisht vëmendjes së vazhdueshme të publikut ndaj jetës së saj sentimentale, aktorja dhe këngëtarja mbetet e sigurt dhe e qëndrueshme në vetvete.
