Tahir Elezkurtaj është i ngarkuar me 10 lëndë penale nga Prokuroria Themelore e Prizrenit për veprën e njëjtë, “vjedhje e energjisë elektrike” përcjell Gazeta Papirus.
Kështu thuhet në përgjigjen e Prokurorisë Themelore të Prizrenit për Kiks Kosovën, sipas të cilës të gjitha rastet janë trajtuar dhe janë zgjidhur, disa me ndërmjetësim në prokurori e për disa lëndë janë ngritur aktakuza në gjykatë, për të cilat në tri raste të cilat kanë arritur t’i identifikojnë ekzistojnë aktgjykime dënuese.
Sipas asaj që thotë Tahir Elezkurtaj dhe mbrojtja e tij, dhe që shihet edhe në certifikatën mbi dënimet penale të Elezkurtajt, të cilën e ka në dispozicion Kiks Kosova, ekzistojnë vetëm dy aktgjykime të formës së prerë, dënime me kusht të datave 8 mars 2024 dhe 1 dhjetor 2022.
Në aktgjykimin e 31 tetorit të 2020-ës të Gjykatës Themelore në Prizren, i cili u bë i plotfuqishëm më 1 dhjetor të 2022-ës, Tahir Elezkurtaj u shpall fajtor për veprën penale vjedhje e energjisë elektrike më 18 maj të 2020-ës.
Në këtë kohë, Elezkurtaj ka thënë për Kiksin që kishte pranuar fajësinë, ngase në Gjykatë i kishin thënë që mund të ketë problem me vizën kroate ngase disa javë pas kësaj seance, Elezkurtaj do udhëtonte për Kroaci për të punuar atje.
Por me kaq nuk përfundoi historia e Elezkurtajt me KEDS-in. 59-vjeçari, ndonëse me 17 nëntor të 2020-ës filloi punën në shtetin kroat, dhe që nga atëherë sipas tij në Kosovë vinte vetëm për pushime, kallëzimet penale nga KEDS-i dhe aktakuzat e Prokurorisë nuk u ndalën.
KEDS-i madje në një përgjigje për KIKS Kosovën, tha që konsumatori në fjalë ka 11 procesverbale në emër të tij për shkak të keqpërdorimit me “Rikthime të Humbjeve të ekzekutuara”.
Aktakuza e radhës ishte e datës 18 mars 2021, kohë kjo në të cilën Elezkurtaj thotë që ka qenë në shtetin kroat duke punuar në fushën e ndërtimtarisë.
Pas një viti, ishte përpiluar edhe një aktakuzë tjetër, e 16 shkurtit të 2022, sipas së cilës, më 20 dhjetor të 2021-ës, në shtëpinë e Elezkurtajt, kishte përfituar kundërligjshëm nga shërbimet e energjisë elektrike, kohë kjo në të cilën Elezkurtaj thotë të ketë qenë në Kroaci.
Në këtë aktakuzë thuhej që në procedurën e provave është bërë shikimi dhe leximi i fakteve, ndër to edhe i një fotoalbumi.
Por sipas Elezkurtajt, në të gjitha seancat është shëtitur veç një foto e shtyllës elektrike në distancë. Por që të njëjtën as avokati i tij e as Kiks Kosova nuk arriti ta sigurojë as nga Gjykata, Prokuroria e as nga vet KEDS-i.
Për të njëjtën, Gjykata në një përgjigje për Kiksin tha që në dy aktgjykimet, pasi që i akuzuar ka pranuar fajësinë, nuk është hapur shqyrtimi gjyqësor për leximin e provave materiale.
Radha i erdhi një seance dhe aktgjykimi tjetër të datës 26 janar 2024, i cili u bë i formës së prerë me 8 mars 2024 dhe Elezkurtaj u dënua për herë të dytë me kusht. Sipas këtij aktgjykimi, Elezkurtaj nga 8 qershori deri më 9 shtator 2021 kishte vjedhur energjinë elektrike. Në këtë aktgjykim, figuron që Elezkurtaj e pranon fajësinë, megjithatë për Kiksin 59-vjeçari kishte thënë që asnjë deklaratë e tij nuk ishte marrë parasysh kësaj here dhe nuk e kishte pranuar fajësinë.
Kësisoj Elezkurtaj tashmë është i dënuar dy herë me kusht për veprën e njëjtë penale, por që kësaj ende po ia sheh sherrin. Kjo ngase që nga gushti i nxehtë i 2024-ës nuk ka rrymë. KEDS për Kiksin përmes emailit tha që konsumatori vazhdon të jetë i shkyçur shkaku mospagesës së borxhit.
Detajet e këtij rasti, ndiqni në kronikën në vijim:
