Prokuroria Themelore në Ferizaj i ka hedhur poshtë raportimet e mediave për lidhjen e rastit të vrasjes së policit Muhamed Lika me një rast të grabitjes, transmeton Gazeta Papirus.
Mediat raportuan se motivi i vrasjes së rreshterit policor në Kaçanik mund të ketë ndërlidhje me një rast të dyshuar të grabitjes.
Mirëpo, Kryeprokurori i Ferizajt, Burim Çerkini e hodhi poshtë këtë mundësi, në një konferencë për media të mërkurën.
“Nuk ka të bëj me pistën e grabitjes”, tha ai. “I ndjeri ka qenë duke u kthye nga puna i tij i punës në orën 11 të natës, në përfundim të ndërrimit të dytë, dhe ka qenë duke shkuar në shtëpinë e tij, në banesën ku jetonte”.
Ai tha se, sipas hetimeve fillestare të rastit, vërehet se kemi të bëjmë me një ekzekutim apo vrasje të rëndë.
“Nuk ekziston ndonjë pistë hetimi që të dyshuarit kanë pasur qëllim grabitjen, vërehet qartë se qëllimi i tyre ka qenë ekzekutimi apo kryerja e veprës penale të vrasjes së rëndë”, tha Çerkini.
