Sekretari për Punë të Jashtme i Mbretërisë së Bashkuar, David Lammy, ka takuar edhe krerë të opozitës në vend, transmeton Gazeta Papirus.
Ai u prit në takim nga kryetari i PDK-së, Memli Krasniqi, “në një takim të rëndësishëm për raportet mes dy vendeve”.
Krasniqi në këtë takim theksoi rolin kyç të Britanisë së Madhe në mbështetjen e Kosovës, veçanërisht në momente historike si lufta për çlirim.
“Mbretëria e Bashkuar ka luajtur gjithmonë një rol të drejtpërdrejtë në proceset kyçe për Kosovën dhe ne dëshirojmë ta shohim atë të vazhdojë këtë angazhim,” tha Krasniqi pas takimit.
“Gjatë bisedës, ai informoi Sekretarin Lammy për vizionin e PDK-së për të udhëhequr Qeverinë e re të Kosovës me Bedri Hamzën si Kryeministër, duke theksuar prioritetet kryesore: zhvillimin ekonomik, forcimin e marrëdhënieve me partnerët strategjikë dhe avancimin e integrimit euroatlantik”, njoftoi PDK-ja.
Krasniqi gjithashtu mirëpriti emërimin e Ambasadores Karen Pierce si e Dërguar e Posaçme për Ballkanin Perëndimor, duke theksuar se “përvoja e saj do të jetë një vlerë e shtuar për proceset e rëndësishme në rajon”.
“Roli i Britanisë dhe uniteti i QUINT-it janë vendimtarë për stabilitetin rajonal. Kosova ka në Mbretërinë e Bashkuar një mik të dëshmuar,” përfundoi ai.
