Zyra e Rregullatorit të Energjisë (ZRrE) ka paralajmëruar një rritje prej 15% të çmimit të energjisë elektrike në Kosovë, një vendim që ka shkaktuar shqetësim dhe pakënaqësi të madhe në opinionin publik.
Të shtunën, më 5 prill 2025, në Prishtinë do të mbahet protestë kundër rritjes së çmimit të energjisë elektrike, ku aktivistë dhe qytetarë do të mblidhen për të kundërshtuar shtrenjtimin e rrymës.
Qytetarët, bizneset dhe ekspertët ekonomik kanë shprehur shqetësim se kjo rritje do të ndikojë negativisht në ekonominë e familjeve dhe sektorët e ndryshëm, duke shtuar ngarkesën financiare për shumë grupe sociale.
Deputeti i Partisë Demokratike të Kosovës, Ferat Shala, është deklaruar ndaj paralajmërimit të ZRrE për shtrenjtimin e energjisë elektrike prej 15%, duke theksuar se nuk janë dhënë sqarime të mjaftueshme lidhur me mënyrën se si është kalkuluar kjo shifër.
“ZRrE ka paralajmëruar shtrenjtimin e rrymës prej 15%, por nuk ka dhënë asnjë sqarim se si është kalkuluar kjo shifër dhe pse pikërisht 15%. Pastaj paqartësi ka në mënyrën e implementimit”, thotë Shala.
Ai ka shprehur shqetësim se ky vendim do ta rëndojë edhe më shumë gjendjen e qytetarëve.
“Nëse ky është kategorizim dhe rritje prej 15% nënkupton rritje lineare e nëse është këso rritje kush kujdeset për konsumatorët fillestar. Nëse ka përshkallëzim, ne duhet kemi informacione shtesë. Po kjo po e rëndon gjendjen e qytetarëve”, deklaroi Shala për Frontonline.
Ish-ministri i Tregtisë, Ismet Mulaj, është shprehur se shtrenjtimi i çmimit të energjisë elektrike për 15% do të favorizojë operatorët privat të energjisë, duke dëmtuar qytetarët.
“Ky vendim do të jetë në funksion të operatorëve ekonomik privat që tregtojnë energji elektrike se sa në favor të qytetarëve”, theksoi Mulaj.
Sipas Mulajt, më shumë se 1300 biznese do të kalojnë në tregun e lirë, ku do të blejnë energjinë nga operatorët privatë.
“Mbi 1300 biznese do dalin në tregun e lirë dhe ato biznese që dalin në tregun e lirë, do e blejnë energjinë nga operatorët dhe këto i jepet hapësirë operatorit për të përfituar dhe kështu dëmtohet qytetari. Nëse 1-2 mijë dalin në treg të lirë, pse atëherë duhet ketë rritje të energjisë elektrike”, thotë Mulaj.
Njohësi i çështjeve ekonomike, Jakup Bellaqa, është deklaruar ndaj paralajmërimit për shtrenjtimin e rrymës për 15%, duke thënë se ky vendim mund të ketë pasoja të rënda për kategoritë sociale.
Ai ka apeluar që ZRRE të rishikojë vendimin dhe të mos miratojë çmime të larta dhe të pa përballueshme për qytetarët.
“Paralajmërimi për shtrenjtimin e rrymës është shqetësuese se kur ka rritje të çmimit të rrymës se kategoritë sociale dhe me të hyra më të ulëta dhe bizneset ju ndikon shumë negativisht. Kjo nuk do duhej të ndodhë, ZRRe nuk duhet të merr vendim për çmimin e larta dhe të pa përballueshme dhe ta vështirësoj jetën e qytetarëve”, shprehet Bellaqa.
