Përplasjet verbale që kishin nisur gjatë emisionit kanë përfunduar me kërcënime.
Pas deklaratës së hulumtuesit të IKD-së, Flamur Kabashi, se gjykatat për lojën e “ping-pongut”, duke i kthyer rastet ndërmjet gjykatave pa arritur një vendim përfundimtar, ish-kryetari i Gjykatës së Apelit, Hasan Shala kishte eskaluar.
“Pse ti merr donacione prej shteteve të huaja dhe jep raporte për qejf të atyne është problem krejt tjetër. Unë di shumë mirë çka keni ba ju kur ka qenë fjala për vetting, e ju keni marr donacion me miliona”, kishte thënë Shala në këtë emision.
Mirëpo episodi i Shalës me fyerje nuk kishte përfunduar këtu. Ai kishte vazhduar edhe me kërcënime pas përfundimit të emisionit. Ish-kryetari i Apelit, tani avokat, e kishte kërcënuar me hedhje nga dritarja.
“Mshele gojen more balosh se të gjuaj për dritare”, mësohet t’i ketë thënë ish-kryetari i Gjykatës së Apelit hulumtuesit, Flamur Kabashi.
Krejt këto kërcënime, ish-kryetari i Apelit i ka bërë teksa në brez ishte mbajtur një revole.
Menjëherë pas kësaj ngjarje, Flamur Kabashi e kishte denoncuar rastin në polici dhe më pas policia, me urdhër të Prokurorisë, kishte nisur hetimet.
Fillimisht rastin e kishte trajtuar Prokuroria Themelore në Prishtinë, mirëpo rasti kishte kaluar në Prokurorinë Themelore në Ferizaj, për shkak të konfliktit të mundshëm të interesit, pasi që djali i ish-kryetarit të Gjykatës së Apelit punon në Prokurorinë Themeleore të Prishtinës.
Emri i Shalës është lakuar edhe në aferen pronto.
Në dhjetor të vitit 2011, ish-shefi i Grupit Parlamentar të Partisë Demokratike të Kosovës, Adem Grabovci, pranoi një telefonatë nga avokati dhe miku i tij, Idriz Ibraj. Ai i sugjeronte Grabovcit që të mbështesë kandidaturën e një personi të quajtur Hasan, për një detyrë në Këshillin Gjyqësor të Kosovës.
