Kryeministri hungarez, Viktor Orban, ka reaguar ashpër pas thirrjes së Bashkimit Evropian drejtuar qytetarëve që të grumbullojnë furnizime për të paktën 72 orë në rast të një krize lufte.
Përmes një postimi në rrjetin social “X”, Orban ka deklaruar se Hungaria nuk e beson këtë “çmenduri” dhe se vendi i tij nuk do të lejojë të përfshihet në luftë.
“Komisioni Evropian dëshiron që familjet tona të grumbullojnë furnizime për 72 orë, por pse? A po përgatiten për luftë? Hungaria nuk do të tërhiqet zvarrë në këtë çmenduri. Ne mbështesim paqen, jo konfliktin e pafund,” ka shkruar Orban.
Ai ka theksuar se nuk sheh ndonjë kërcënim lufte ndaj Evropës nga jashtë dhe se përplasjet në Ukrainë nuk do të prekin vendet e NATO-s si Budapestin, Varshavën apo shtetet baltike.
Sipas tij, ndërkohë që SHBA po punon për një armëpushim, “elitat brukseliane” po bëjnë të kundërtën dhe synojnë zgjatjen e konfliktit.
“Amerika tani është në anën e paqes. Evropa? Ende duke nxitur në mënyrë të pamatur për luftë. SHBA po negocion për një armëpushim, ndërsa elitat brukseliane kanë në plan të zgjasin konfliktin. Ata tani flasin për rekrutimin e detyrueshëm, gjuetinë politike të shtrigave, madje edhe një NATO paralele për të na marshuar,” ka shtuar ai.
Orban ka ripërsëritur qëndrimin e Hungarisë kundër përfshirjes në luftë, duke thënë se vendi i tij do të mbështesë planin e paqes të propozuar nga ish-presidenti amerikan, Donald Trump.
