Zyra e Rregullatorit për Energji (ZRRE) ka reaguar pas disa postimeve në rrjete sociale, ku pretendohej se sistemi për pranimin e komenteve nga qytetarët lidhur me raportin konsultativ për tarifat e reja të energjisë është bllokuar.
Përmes një njoftimi, ZRRE ka mohuar këto pretendime, duke theksuar se çdo koment i dërguar është marrë në shqyrtim dhe nuk ka pasur asnjë problem teknik në sistem.
“ZRRE siguron qytetarët se çdo komunikim është trajtuar me seriozitet dhe të gjitha komentet e pranuara janë regjistruar pa asnjë ndërprerje. Pas verifikimeve, është konstatuar se nuk ka pasur ndonjë bllokim apo problem në sistemin e pranimit të komenteve”,thuhet në reagimin e tyre.
Ndërkohë, nga muaji prill, qytetarët e Kosovës mund të përballen me rritje të çmimit të energjisë elektrike deri në 15 për qind.
Aktualisht, për konsumatorët që shpenzojnë deri në 800 kWh në muaj, çmimi i rrymës gjatë ditës është 7.79 centë për kilovat, ndërsa pas shtrenjtimit do të arrijë në 8.96 centë.
ZRRE ka theksuar se rritja e tarifave është e pashmangshme, për shkak të uljes së prodhimit të energjisë, rritjes së konsumit dhe varësisë nga importet me çmime të larta.
Tarifat e reja pritet të hyjnë në fuqi më 1 prill dhe do të jenë valide deri më 31 mars të vitit të ardhshëm.
