Zyra e Kryeministrit të Kosovës ka reaguar pas incidentit të një telefonate mashtruese (prank call) që kishte në shënjestër kryeministrin Albin Kurti, duke e lidhur atë me fushatën e vazhdueshme të dezinformimit nga Rusia kundër Kosovës.
Sipas njoftimit zyrtar, incidenti ndodhi më 11 shkurt, pak ditë pas zgjedhjeve parlamentare të 9 shkurtit, në një periudhë kur Kurti po pranonte mesazhe të shumta urimi dhe thirrje për rezultatin e zgjedhjeve. Për shkak të volumit të madh të komunikimeve, nuk ishte gjithmonë e mundur të kryheshin verifikimet e plota për çdo telefonatë.
“Ky incident fatkeq përforcon atë që kemi diturprej kohësh: Rusia është e fiksuar pas Kosovës dhe vazhdon ta ketë cak vendin tonë,” thuhet në deklaratën e Zyrës së Kryeministrit. Sipas qeverisë, gjatë fushatës zgjedhore, mediat ruse si Sputnik Serbia dhe Russia Today (RT) kanë publikuar mbi 60 lajme të rreme dhe artikuj dezinformues, me qëllim ndërhyrjen në procesin demokratik në Kosovë. Këto gjetje janë dokumentuar edhe nga Misioni i BE-së për Vëzhgimin e Zgjedhjeve.
Reagimi i plotë:
Deklaratë e Zyrës së Kryeministrit në lidhje me incidentin me telefonatën – prank call
Ngjarja ka ndodhur më 11 shkurt, pak pas zgjedhjeve të 9 shkurtit, në një periudhë kur kryeministri Kurti po pranonte mesazhe të shumta urimi dhe thirrje për rezultatin e zgjedhjeve. Për shkak të kohës, jo gjithmonë ishte e mundur të kryheshin verifikimet e plota të çdo telefonate.
Ky incident fatkeq përforcon atë që kemi e ditur prej kohësh: Rusia është e fiksuar pas Kosovës dhe vazhdon ta ketë cak vendin tonë. Gjatë fushatës zgjedhore për zgjedhjet parlamentare të 9 shkurtit, Sputnik Serbia dhe Russia Today (RT) publikuan mbi 60 lajme të rreme dhe artikuj dezinformues, duke ndërhyrë në procesin tonë demokratik, siç dokumentohet nga Misioni i BE-së për Vëzhgimin e Zgjedhjeve.
Teksa na vjen keq që kryeministri Albin Kurti u bë shënjestër e një thirrje të tillë, ky episod rikonfirmon qëndrimet parimore dhe konsistente të kryeministrit Kurti për çështjet kyçe, si në biseda publike ashtu edhe në ato private.
