32 milionë euro është shuma e makinerive ushtarake që janë blerë nga Ministria e Mbrojtjes. Këtë e ka bërë të ditur ministri i Mbrojtjes, Armend Mehaj, para anëtarëve të Komisionit për Çështje të Sigurisë dhe Mbrojtjes.
“Sa i përket rritjes së kapaciteteve të FSK-së, konkretisht janë blerje ushtarake dhe për ta modernizuar ushtrinë tonë, kemi blerë pajisje ushtarake nga SHBA-ja, ku kjo formë është blerje direkt nga shteti”.
“Me anë këtyre marrëveshjeve e rrisim partneritetin me miqtë tanë ndërkombëtarë, por e realizojmë blerjet me çmime më konkrete. Blerjet janë të sigurua, realizim më konkret dhe çmimi është më konkret”.
“Në total për këto blerje në Ministrinë e Mbrojtjes janë blerë rreth 32 milionë euro, këtu përfshihen lloje të armatimeve, snajperë, dronë dhe pajisje të tjera që nuk mundem t’i përmend para opinionit”, tha Mehaj.
Mehaj gjatë raportimit në Komisionin për Çështja të Sigurisë dhe Mbrojtjes tha se kanë marrë konfirmimin se Kosova do të jetë nikoqire e operacionit ushtarak “Defender Europe 2023”.
Ai konfirmoi se Ministria e Mbrojtjes veçse ka filluar përgatitjet për këtë operacion, që do të mbahet pas dy vjetësh.
“Më 25 tetor kemi marrë konfirmimin se Kosova do të jetë vendi nikoqir i ‘Defender Europe 2023’. Kjo ka rëndësi të madhe për ne, sepse do të marrim pjesë me dy regjimente. Ne kemi filluar menjëherë përgatitjet si me blerjen e pajisjeve ushtarake që nevojiten për këtë ushtrim”, tha ministri.
Më tutje, Mehaj tha se ky konfirmim dëshmon se Kosova dhe SHBA-ja i kanë raportet e mira dhe të ngushta.
“Kjo edhe një herë e dëshmon bashkëpunimin e ngushtë që e kemi me SHBA-në dhe besimin e tyre ndaj neve. Unë e ritheksoj në plotësi se kurrë më mirë s’kemi pasur bashkëpunim me SHBA-në sesa që kemi sot. Këtë mundet t’ua konfirmojë edhe SHBA-ja”, ka thënë Mehaj.
Pas përfundimit të raportimit të ministrit Mehaj, kryetari i këtij Komisioni, Bekë Berisha, kërkoi që ky raportim i tij të jetë pa praninë e mediave.
