Dhomat e Specializuara të Kosovës e kanë konfirmuar se kanë pranuar një korrespodencë nga Ministria e Drejtësisë në Kosovë për rastin e moslejimit të Thaçit për të marrë pjesë në varrimin e babait.
Në një përgjigje, zyra për media e Speciales nuk ka dhënë detaje për përmbajtjen e letrës.
“Konfirmojmë se Dhomat e Specializuara kanë marrë korrespondencë nga Ministria e Drejtësisë e Kosovës për këtë çështje. Ne nuk japim detaje mbi korrespondencën tonë nëse nuk bëhet pjesë e një dosjeje publike”, thuhet në përgjigjen e tyre për Nacionalen.
Ministrja e Drejtësisë, Albulena Haxhiu, kishte paralajmëruar se do t’i shkruajë kryetares së Gjykatës Speciale.
Haxhiu kishte pasur kritika pas refuzimit që iu bë Hashim Thaçit për të marrë pjesë në varrimin e babait.
“Proceset gjyqësore duhet të jenë të drejta e të bazuara mbi respektimin e të drejtave më elementare njerëzore. Nuk ka gjë më njerëzore sesa të marrësh pjesë në varrimin e prindit. Andaj, krejt absurde nga ajo që kuptuam nga mediat se ish-presidentit Thaçi nuk i është dhënë leja për të marrë pjesë në ceremoninë e varrimit të babës. Lidhur me këtë vendim të padrejtë do t’i shkruaj kryetares së Dhomave të Specializuara”, kishte shkruar Haxhiu.
Kanë kaluar tri ditë që nga vdekja e Haxhi Thaçit, babait të ish-presidentit, Hashim Thaçi.
Megjithatë, Thaçi ende nuk ka ardhur në Kosovë as për të pame deri më tash, se lëre për varrim.
Kjo pasi Dhomat e Specializuara të Kosovës ende nuk kanë dhënë leje që ai ta vizitojë Kosovën.
Kjo pavarësisht se kërkesa u bë ditën e hënë në orën 14:00. Kështu të paktën kishte konfirmuar vetë avokati i Hashim Thaçit, Luka Misetiq.
“Z. Thaçi ka bërë kërkesë dje para orës 14:00 për të marrë pjesë në varrimin e sotëm. Zoti Thaçi nuk do të marrë pjesë në varrimin e sotëm. Nuk do të kem asnjë koment të mëtejshëm për momentin”, ka shkruar Misetiq.
