Prokuroria Speciale e Kosovës ka ngritur aktakuzë ndaj Muharrem Ibrajt, shqiptar nga fshati Osek Hilë i Gjakovës, për veprën penale “Krim lufte kundër popullsisë civile”, e sanksionuar me nenin 142 lidhur me nenin 22 të Ligjit Penal të ish-RSFJ-së.
Sipas hetimeve, gjatë periudhës 1998-1999, Ibraj, duke vepruar në bashkëkryerje me pjesëtarë të forcave policore serbe, ka kryer vrasje, dhunime, arrestime dhe keqtrajtime ndaj civilëve shqiptarë në fshatin Osek Hilë të Gjakovës. Viktimat ishin persona të paarmatosur dhe të pafajshëm, përfshirë të moshuar dhe fëmijë.
Banorët e fshatit kanë rrëfyer për krimet e tij, duke e përshkruar si një ekzekutor të pamëshirshëm. Zade Bajrami, një nga të mbijetuarat, tregon se pa me sytë e saj momentin kur ia vranë bashkëshortin.
“Në atë moment nuk e di pse nuk kam tranu. Sot, kur e kujtoj, më duket sikur ka ndodhur dje. Kemi pasur shumë vështirësi, kemi menduar se do të mbetemi pa bukë. Ai ende është i lirë, ndërsa në Gjakovë kanë vrarë plotë,” rrëfen ajo.
Një tjetër banor shpjegon se si ai dhe të tjerët u ndaluan nga forcat serbe ndërsa po ktheheshin nga shkolla.
“Na kanë ulur në gjunjë me armë të gjata dhe na kanë pyetur se ku po shkonim. Kur u thamë se po ktheheshim nga shkolla, na rrahën me shuplaka dhe na kërcënuan që të mos ktheheshim më,” kujton ai.
Muharrem Ibraj, në verën e vitit 2005, ishte paraqitur në Hagë si dëshmitar mbrojtës i Sllobodan Millosheviçit.
Rrëfimet e plotë ndiqeni më poshtë:
