Ish-presidenti Hashim Thaçi, në një prej intervistave të rralla për Blendi Fevziun (realizuar më 17 shkurt 2008) do të përgjigjej në këtë pyetje të gazetarit: “A ka ndodhur ndonjëherë që nëna ose babai t’ju ketë thënë kujdes se kjo mund t’ju kushtojë me jetën?”.
Dhe Thaçi do të përgjigjej si më poshtë, duke kujtuar fjalët e babait të tij – tashmë të ndjerë – Hashi Thaçit, në vitin 1993, një vit pas aksionit të Hashim Thaçit me shokë kundër stacionit policor serb në Drenas.
“Ka qenë një moment intersant në vitin 1993, pas përfundimit të aksioneve të para.
Prindërit e dinin se kisha hyrë në veprimtarinë kundër ushtrisë dhe policisë serbe. I njihnin Adem Jasharin dhe bashkëluftëtarët e mi. E dinin se mbanim mbledhje edhe në Prekaz, edhe në shtëpinë time në fshat.
E njihin edhe Kadri Veselin.
Shpesh e di se përshëndetjet me prind mund të ishin të fundit, para se të shkonim në aksione.
Në një moment, ishte e shtunë, si sot më kujtohet, po qëndronim me familjen në oborr në një ditë pranverore dhe mbetëm vetë unë dhe babai im.
Ai më tha që e di se ke hyrë thellë në punë që janë të randa, por biri im, ki kujdes. Bëj çka të bësh, ruaje veten, ruaji shokët, për me Serbinë – mos u mërzit, mos u korit.
Ky mesazh i prindit tim, ka qenë gjithmonë mesazh i unitetit, i besës, qëndresës dhe humanizmit”, rrëfente Thaçi në intervistën te Blendi Fevziu, realizuar në Ditën e shpalljes së Pavarësisë, 17 shkurt 2008.
