Shërbimi Gjerman i Inteligjencës (BND) beson se ka një mundësi prej 80-90% që koronavirusi të ketë dalë aksidentalisht nga një laborator në Kinë, sipas raportimeve të mediave gjermane. Ky informacion u bë i njohur tani, edhe pse u përgatit që në vitin 2020 dhe nuk ishte publikuar më parë.
Raporti thotë se BND kishte indikacione se Instituti i Virologjisë në Wuhan mund të ketë bërë eksperimente për të modifikuar viruset dhe për t’i bërë ato më ngjitëse për njerëzit. Megjithatë, nuk ka prova konkrete që ta mbështesin këtë teori.
Kina ka mohuar këto akuza dhe ka thënë se origjina e COVID-19 duhet të përcaktohet nga shkencëtarët, jo nga teoritë politike. Hetimet e Organizatës Botërore të Shëndetësisë (OBSH) në vitin 2021 sugjeruan se teoria e rrjedhjes nga laboratori ishte shumë e pamundur. Megjithatë, disa agjenci inteligjence, si CIA, janë duke e mbështetur tani mundësinë e një rrjedhje aksidentale.
Në vitin 2020, Shërbimi Gjerman i Inteligjencës zhvilloi një hetim të quajtur “Project Saaremaa” për të shqyrtuar origjinën e COVID-19. Ky hetim e vlerësoi teorinë e rrjedhjes nga laboratori si të mundshme, por pa prova të mjaftueshme për ta konfirmuar. Disa shkelje të mundshme të sigurisë në laboratorin e Wuhan janë përmendur si faktorë të mundshëm, raporton BBC, transmeton Klankosova.tv.
Ky raport ishte një kërkesë e kancelarës së atëhershme të Gjermanisë, Angela Merkel, dhe nuk ishte publikuar më parë. Sipas mediave gjermane, informacioni u nda me CIA-n në vjeshtën e vitit 2024.
Një zëdhënës i Ministrisë së Jashtme të Kinës ka theksuar se çështja e origjinës së COVID-19 duhet të hetohet nga shkencëtarët dhe jo të përdoret për qëllime politike. Kina ka kërkuar që kjo temë të mos manipulohet.
Si pasojë e COVID-19 kanë vdekur 7 milionë persona në mbarë botën, edhe pse shumë ekspertë mendojnë se numri i vërtetë mund të jetë më i lartë.
