Komisioni Qendror i Zgjedhjeve ka mbajtur mbledhjen e radhës ku është diskutuar për procesin zgjedhor të mbajtur më 9 shkurt.
Në këtë mbledhje, KQZ-ja ka vendosur që të rinumërohen 50 kuti, nga ato 35 në Vushtrri e 15 në komunat e tjera.
Anëtari nga radhët e Partisë Demokratike të Kosovës, Arianit Elshani, tha se Këshilli i operacioneve zgjedhore ka rekomanduar rinumërimin e disa kutive të votimit në dy raste të ndara.
“Janë idetifikuar 15 vendvotime në të cilat ka mospërputhje mes një nënshkrimi dhe dy nënshkrime, pra dy nënshkrime në listën e nënshkrimeve dhe një fletëvotim ose dy më pak ose më shumë në kutin e votimit. Është rekomanduar që të procedohen për një rinumërim të plotë për të gjitha subjektet politike”, tha Elshani.
Elshani foli edhe rreth çështjes së rinumërimit të disa votave në Vushtrri pas vendimit të Prokurorisë.
“Sa i përket rekomandimit tjetër është me raportin që kemi pranuar për rezultatet e kandidatëve të LDK-së të dal gjatë hetimit që është bërë në vendvotimet në komunën e Vushtrrisë. Këtë raport të mospërputhjeve apo të ndryshimeve mes rezultateve në Qendrat Komunale të Numërimit dhe rezultatet e dala nga hetimi në QNR ka ardhur si rekomandim që 35 vendvotime për të cilat vërehet pra është me e dukshme diferenca mes votave të kandidatëve të shkojnë në rinumërim të plotë në Vushtrri, për të gjitha subjektet politike dhe kandidatët. Këshilli i operacioneve zgjedhore”, tha Elshani.
Pas kësaj, kryetari i KQZ-së Kreshnik Radoniqi, e hodhi në votim ku me 9 vota për u miratua rekomandimi për rinumërimin e 50 kutive të votimit.
