Ministri i Mbrojtjes, Ejup Maqedonci është takuar me ambasadorin turk, Sabri Tunç Angili, ku bëri të ditur se së shpejti mund të ndërtohet fabrika e municioneve dhe dronëve “Made in Kosova”.
Këtë deklaratë të ministrit, lajm të mirë e ka quajtur eksperti i sigurisë, Bedri Elezi.
“Është lajm i mirë që po bëhen përgatitje, që në Kosovë eventualisht të ketë prodhime të municioneve dhe armatimeve, e sidomos kur kemi një angazhim serioz në botë sa i përket industrisë së armatimeve”, tha Elezi.
Nga ana tjetër, gazetari Florent Zeqaj thotë se është e paarritshme realizimi i një fabrike municionesh brenda kaq pak kohe, transmeton Klankosova.tv.
“Nuk do të thotë që nuk do të mund ta arrijë këtë shteti i Kosovës”, tha tutje ai.
Por për gazetarin Milaim Zeka, deklarata e Maqedoncit është thjesht një gënjeshtër.
“Ministri e ka lëshuar një rren aq të madhe, rren, hipokrizi, poshtërsi, vetëm për shkak të zgjedhjeve. Por nuk bëhet shaka me ushtri”, u shpreh Zeka.
E për gazetarin Korab Blakaj, fabrika e municioneve në Kosovë do të bëhet realitet.
“Jo vetëm që mendoj se mund të bëhet realitet, por jam shumë i bindur që do të bëhet realitet, dhe nuk do të jetë shumë larg dita kur do të fillojë ndërtimi i fabrikës”, tha ai.
