Zgjedhjet janë mekanizëm i zakonshëm, i patjetërsueshëm, në vendet demokratike.
Përmes këtij procesi grupet shoqërore apo komunitetet e caktuara vendosin për udhëheqësit e tyre. Zgjedhin ata që besojnë se do t’i përfaqësojnë më së miri interesat e tyre.
Kështu natyrshëm funksionojnë demokracitë.
Por, kjo nuk vlen për pozitat udhëheqëse të organizatave që përfaqësojnë një pjesë shumë të ndjeshme të shoqërisë: kategoritë e dala nga lufta.
Dy shoqata të kategorive të dala nga lufta, Shoqata e Invalidëve të Luftës dhe Shoqata e Familjarëve të Dëshmorëve, i kanë shpërfillur të gjitha parimet e demokracisë dhe të statuteve që i kanë miratuar vet. Aty, kuvendet zgjedhore nuk janë zhvilluar me vite të tëra.
Shoqatën e Invalidëve të Luftës e udhëheq prej vitit 2011, Fadil Shurdhaj. Ai e mban këtë post tash e 14 vjet dhe data e kuvendit të ri zgjedhor në këtë shoqatë duket të jetë e diskutueshme.
Por, Shurdhaj i di mirë parimet e demokracisë. Vetëm se nuk i zbaton ato.
Në një bisedë telefonike me Paparacin të premten, ai shpjegoi se kryetari i shoqatës zgjidhet nga kuvendi pas një ndarje të degeve, ku dega ka tre delegatë që votojnë për kryetarin.
Ndërrimi i kryetarëve, shpjegoi ai, ndodh çdo 4-5 vjet, ose “më shpesh në varësi të situatës”.
Megjithatë, ky vit është përmendur si vit zgjedhor për shoqatën, edhe pse zgjedhjet e fundit u mbajtën para pesë vitesh.
Me një situatë të tillë po ballafaqohet edhe Shoqata e Familjeve të Dëshmorëve, një organizatë tjetër e rëndësishme që përfaqëson kategoritë e dala nga lufta, e cila drejtohet tash e gati 20 vite nga Xhavit Jashari.
Jashari, i kontaktuar nga Paparaci të premten, nuk preferoi të jepte përgjigje për organizimin e brendshëm dhe mungesën e transparencës në zgjedhje të tij dhe anëtarëve të tjerë të kryesisë.
Ai i sugjeroi mediumit që për këtë çështje të drejtohet te Shoqata e Invalidëve të Luftës.
Që nga viti 2002 në Ministrinë e Punës dhe Mirëqenies Sociale (MPMS), janë regjistruar disa kategori të luftës dhe të gjitha marrin pensione. Ato marrin financime nga Buxheti i Kosovës dhe kanë zyra në të gjitha komunat e Kosovës ku e ushtrojnë aktivitetin e tyre.
