Kryeministri aktual, Albin Kurti, është ftuar tri herë radhazi nga Prokuroria Speciale që të dëshmojë në rastin e rezervave shtetërore, mirëpo ai ka refuzuar ta bëjë një gjë të tillë. Kjo e ka detyruar Prokurorinë Speciale që të kërkojë nga Gjykata në Prishtinë që ta urdhërojë kryeministrin Kurti të paraqitet për intervistim. Ish-kryetari i Gjykatës Supreme, Fejzullah Hasani, për Gazetën Express, ka treguar se cilat janë tri alternativat për ta urdhëruar Kurtin që të dëshmojë.
Gjykata Themelore në Prishtinë e ka pranuar kërkesën e Prokurorisë Speciale që kryeministri Kurti të paraqitet në prokurori për të dhënë dëshmi në cilësinë e dëshmitarit në rastin e rezervave shtetërore. Këtë për Express e konfirmoi zëdhënësja e Gjykatës Themelore në Prishtinë, Mirlinda Gashi. Ajo tha se po e shqyrtojnë kërkesën e Prokurorisë.
Ish-kryetari i Gjykatës Supreme, Fejzullah Hasani, në një përgjigje për Gazetën Express, ka thënë se janë tri alternativa për ta urdhëruar Kurtin të dëshmojë- ta detyrojë me forcë, ta gjykojë me gjobë dhe ta paraburgosë.
“Me kërkesë të prokurorit, Gjykata i ka këto mundësi, i ka tri alternativa: ta detyrojë me forcë të paraqitet, ta gjykojë me gjobë ose eventualisht nëse paraqitet në gjykatë por hesht, atëherë gjykata e ka mundësinë e tretë – caktimin e paraburgimit derisa ai të bindet të flasë, por jo më tepër se 1 muaj ditë”, është shprehur Hasani.
Sipas tij, Kurti do ta zbatojë vendimin e gjykatës, pasi shton se nëse një gjë e tillë nuk ndodhë atëherë dëmtohet imazhi i Kosovës.
“Nuk besoj që tani nuk do të paraqitet kryeministri për faktin se do të ishte e dëmshme, së pari, për imazhin e shtetit, por do të na dëmtonte edhe karshi faktorit ndërkombëtar, pasi ne jemi në proces të integrimeve dhe qasja e tillë ndaj institucioneve të drejtësisë sigurisht nuk do të shihej mirë nga institucionet ndërkombëtare, plus do të krijohej një situatë jo e këndshme për vetë shtetin e Kosovës”, tha Hasani për Express.
Ehat Miftaraj nga IKD dje në një bisedë me Gazetën Express ka thënë se nëse Kurti nuk përgjigjet edhe pas aprovimit të kërkesës së Prokurorisë mund të gjobitet deri në 250 euro për secilën herë që s’paraqitet.
“Në bazë të ligjit kur dëshmitari i cili është thirrur me rregull nuk paraqitet, e mosparaqitjen nuk e arsyeton, gjyqtari i procedurës paraprake sipas detyrës zyrtare apo kërkesës së prokurorit të shtetit mund ta detyrojë dëshmitarin që të paraqitet. Nëse dëshmitari nuk paraqitet, gjyqtari i procedurës paraprake e dënon atë me gjobë deri dyqindepesëdhjetë (250) Euro për çdo herë që nuk paraqitet. Nëse dëshmitari vazhdon të refuzojë të dëshmojë pasi që është dënuar me gjobë, ai mund të burgoset”, tha ai.
Njohësi i drejtësisë thotë se kërkesa e prokurorisë drejtuar gjykatës është e drejtë dhe e bazuar në ligj.
“Kërkesa e prokurorisë është e drejtë dhe e bazuar në ligj, që qëllim kryesor ka zhvillimin e hetimeve në një rast penal ku kryeministri Kurti është duke u ftuar si dëshmitar”, tha Miftaraj për Express.
Kurti i kishte ftuar prokurorët ta intervistojnë atë në zyrë
Kryeministri Kurti dhjetorin e vitit të kaluar kishte pranuar tri herë ftesën për t’u intervistuar në rastin e rezervave shtetërore. Që të trija, ai i pat refuzuar.
Zëdhënësi i Qeverisë, Përparim Kryeziu, kishte thënë se Kurti “ka shprehur gatishmërinë t’i mirëpresë prokurorët e rastit në zyrën e tij në një ditë dhe orë të dakorduar nga të dyja palët për të përmbushur kërkesën e dalë nga ftesa e Prokurorisë”.
Një gjë e tillë ishte kritikuar nga ekspertë ligjorë.
Rasti i rezervave shtetërore
Në vitin 2023 ishin arrestuar tre persona në rastin e rezervave shtetërore, në mesin e të cilëve ishin edhe punonjës të Ministrisë së Industrisë, Ndërmarrësisë dhe Tregtisë, që udhëhiqet nga Rozeta Hajdari.
Sipas raportimeve një sasi vaji, e blerë në Poloni, dhe një sasi gruri, e blerë në Turqi, nuk kishin arritur kurrë.
Qeveria ka thënë se pagesat për rezervat shtetërore ishin bërë në përputhje me ligjin.
Hajdari tha në atë kohë se blerjet për rezerva shtetërore janë bërë në përputhje me ligjin, por nuk dha më shumë detaje, meqë informacionet për to janë sekrete shtetërore.
Ajo akuzoi policinë se gjatë bastisjeve, ka marrë në cilësinë e provave dokumente të klasifikuara si sekrete shtetërore.
Kurti i doli në mbrojtje Hajdarit, duke thënë se “nuk ka kurrfarë korrupsioni e keqpërdorimi”.
Në prill të vitit 2024, ministrja Hajdari u ftua për intervistim nga Prokuroria Speciale, nën dyshimet se ka keqpërdorur detyrën zyrtare në lidhje me rezervat shtetërore. Në paraqitjen e saj para prokurorëve, ajo vendosi të mbrohet në heshtje.
