Gjykata Themelore në Mitrovicë ka aprovuar kërkesën e Prokurorisë, për caktimin e masës së paraburgimit kundër të pandehurve H.I., dhe B.I., të dyshuar se kanë kryer veprën penale “vrasjen e rëndë“ në Skenderaj më 12.02.2025.
“Paraburgimi iu caktohet nën dyshimin e bazuar se të pandehurit H.I dhe B.I kanë kryer veprat penale: I. Vrasje e rëndë nga neni 173 par.1 nënpar 1.5 lidhur me nenin 31 të KPRK-së, dhe II. Mbajtja në pronësi, kontroll ose posedim të paautorizuar të armëve nga neni 366 par.1 lidhur me nenin 31 të KPRK-së”, thuhet në njoftimin e gjykatës.
Masa e paraburgimit të pandehurve iu llogaritet në kohëzgjatje prej një (1) muaji.
Gjykata njoftoi se kundër këtij Aktvendimi, është e lejuar e drejta në ankesë, në afat prej 48 orësh nga momenti i pranimi të Aktvendimit. Ankesa i drejtohet Gjykatës së Apelit të Kosovës në Prishtinë.
