Kryetari i PDK-së, Memli Krasniqi ka reaguar pas ngjarjes tragjike në Gllogjan ku mbeten të vrarë katër persona në mesin e tyre edhe dy nxënës.
Krasniqi ka shkruar se është i tronditur nga sulmi makabër që ka ndodhur dhe ka bërë thirrje që organet ta zbardhin rastin dhe autorin ta sjellin para drejtësisë, raporton Gazeta expres.
“I tronditur thellë me sulmin makabër në Deçan!Në këto orë të rënda për familjarët e viktimave, i bashkohemi dhimbjes së tyre, ndërsa të lënduarve ju dëshirojmë shërim të shpejtë. Organet përgjegjëse të sigurisë duhet sa më parë të zbardhin rastin dhe autorin e kësaj vepre të tmerrshme të sjellin para drejtësisë”, ka shkruar Krasniqi.
Një ngjarje tragjike ka ndodhur në Gllogjan të Deçanit, ku një autobus me nxënës është gjuajtur me armë.
Express merr vesh nga burime se përveç shoferit të autobusit dhe dy nxënësve, ka vdekur edhe kondukteri i autobusit.
Ndërsa, kryetari i Deçanit, Bashkim Ramosaj për Express tha se autobusi po barte nxënësit nga Gjakova për në Deçan.
Ai tregoi se dy nxënësit, një djalë dhe një vajzë janë nga fshati Gllogjan, dhe mbiemrat e tyre janë Mustafaj dhe Hamzaj.
Policia e Kosovës e ka konfirmuar për Express se drejt autobusit kanë gjuajtur me armë disa persona.
