Kryeprokurori publik i Prokurorisë së Lartë Publike në Beograd, Nenad Stefanoviq tha se në fund të këtij viti ose në fillim të vitit të ardhshëm do të merret vendim për aktakuzën ndaj Milan Radoiçiqit për sulmin terrorist të vitit të kaluar në Banjskë.
Stefanoviq tha se po kontrollohet deklarata e Radoiçiqit rreth ngjarjes në Banjskë.
“Është kërkuar dorëzimi i raportit të hetimeve, fotodokumentacioni, procesverbalet e autopsisë së të gjithë personave të vdekur, raportet mjekësore të të gjithë personave të lënduar. Janë kërkuar edhe procesverbalet nga ekspertiza e armëve, municionit dhe mjeteve shpërthyese, si dhe procesverbalet nga marrja në pyetje e të pandehurve dhe marrja në pyetje e dëshmitarëve”, tha ai për mediumin në veri të vendit Kosovo Online.
